گوگل نیوز پر ہمیں فالو کریںکراچی:پاکستان پیپلزپارٹی کے چیئرمین بلاول بھٹو زرداری نے کہا ہے کہ پاکستان پیپلزپارٹی کسی بھی وقت ہونے والے عام انتخابات کی تیاری کررہی ہے، عوام ایم کیوایم اور پی ٹی آئی کو ووٹ کی طاقت سے جواب دیں گے۔
تفصیلات کے مطابق کراچی میں میڈیا سے گفتگو کرتے ہوئے چیئرمین پی پی پی بلاول بھٹو زرداری نے کہا کہ اگر اپوزیشن اتحاد پی ڈی ایم سنجیدہ ہے تو پہلے عثمان بزداراور پھرعمران خان کیخلاف تحریک عدم اعتماد لائے۔
میڈیا سے گفتگو کے دوران بلاول بھٹو نے کہا کہ مولانا فضل الرحمان کی عزت کرتے ہیں اور جانتے ہیں کہ متحدہ اپوزیشن حکومت کو نقصان پہنچاسکتی ہے۔ جمہوری انداز سے سیاست کرنے سے حکومت کو نقصان ہوسکتا ہے۔
گفتگو کے دوران چیئرمین پی پی پی نے کہا کہ جب تک پی ڈی ایم میں پیپلزپارٹی موجود تھی، تب تک اپوزیشن مسلسل جیت رہی تھی۔ ضمنی انتخابات میں پیپلزپارٹی کی بات مان کر اپوزیشن کو جیت ملی، تاہم پیپلزپارٹی کسی کے اشارے پر نہیں چلے گی۔
چیئرمین پی پی پی بلاول بھٹو نے واضح کیا کہ پی ڈی ایم کے اجلاس میں پیپلزپارٹی شرکت نہیں کرے گی تاہم پی ڈی ایم کیلئے نیک خواہشات ہیں۔ جو پیپلزپارٹی کی موجودگی میں نہیں ہوسکا وہ پیپلزپارٹی کے بغیر ہوگا۔
پیپلز پارٹی کے چیئرمین نے کہا کہ ہم اس حکومت اور وزیراعظم کو ہر میدان میں چیلنج کریں گے۔ محدود وسائل کے باوجود سندھ حکومت کراچی میں کام کر رہی ہے، تاہم پی ٹی آئی کی وفاقی حکومت کراچی کیلئے کچھ کرنے کو تیارنہیں۔
پی ٹی آئی پر تنقید کرتے ہوئے بلاول بھٹو زرداری نے کہا کہ عوام نے باقی جماعتوں کو بھگت لیا، وفاق نے1100ارب روپے کا اعلان کیا،لیکن ایک روپیہ نہیں دیا۔ حکومت نے صرف کراچی کی عوام کو نقصان پہنچایا ہے۔
دہشت گردی کے واقعات پرچیئرمین پیپلزپارٹی نے کہا کہ دہشت گردوں کے خلاف حکومت کو نیشنل ایکشن پلان پر عمل کرنا چاہئے۔ پورے ملک سے دہشت گردی کا خاتمہ کرسکتے ہیں۔ افغانستان کے بعد دہشتگردوں کا اگلا نشانہ پاکستان ہوگا۔
وزیر اعظم عمران خان کو تنقید کا نشانہ بناتے ہوئے بلاول زرداری نے کہا کہ ہمارا وزیراعظم دہشت گردوں کے ساتھ ہمدردی کا اظہار کرتا ہے جبکہ جان دینے والے سیکیورٹی اہلکاروں کو لاوارث چھوڑ دیا گیا۔
عمران خان پر تنقید جاری رکھتے ہوئے چیئرمین پی پی پی بلاول بھٹو زرداری نے کہا کہ وزیر اعظم کو اپنی پالیسی پر نظر ثانی کرنا ہوگی اور جب تک اس پر نظر ثانی نہیں ہوتی،دہشت گردی جاری رہے گی۔
ایڈمنسٹریٹر کراچی سے متعلق بلاول بھٹو زرداری نے کہا کہ کارکردگی بہتر بنانے کے لیے وزیراعلی سندھ کوشش کررہے ہیں۔ انھوں نے گریڈ 19 کے افسر کی پوزیشن پر کابینہ کے رکن کو بٹھادیا ہے۔
مراد علی شاہ عوام کے مسائل حل کرنے کیلئے کوششیں کریں گے۔ عوام ایم کیوایم اور پی ٹی آئی کو ووٹ کی طاقت سے جواب دیں گے۔بلاول بھٹو نے کہا کہ کچھ عرصے بعد واشنگٹن کا دورہ کروں گا۔امریکا کے دورے کے دوران واشنگٹن نہیں گیا۔
یہ بھی پڑھیں: پی ڈی ایم کا سربراہی اجلاس آج طلب، پی پی پی شریک نہیں ہوگی
