اگر ویکسینیشن کا ہدف پورا نہ ہوا تو کورونا کی پانچویں لہرآسکتی ہے، اسد عمر

اسلام آباد: وفاقی وزیر برائے منصوبہ بندی، ترقی اور اصلاحات اور این سی او سی کے سربراہ اسد عمر نے کورونا کی پانچویں لہر سے بچنے کے لیے ویکسینیشن کے اہداف کو پورا کرنے کی ضرورت پر زور دیا ہے۔

جمعرات کو ایک ٹویٹ میں، انہوں نے کہا کہ اگر لوگوں کی ایک بڑی تعداد ویکسین نہیں لگواتی تو، ہم معاملات میں تیزی سے کمی کے باوجود کمزور رہتے ہیں۔

وفاقی وزیر اسد عمر کا کہنا تھا کہ ویکسین کی دوسری خوراک کورونا وائرس کے خلاف تحفظ کے لیے بہت ضروری ہے۔انہوں نے کہا کہ اسلام آباد، پشاور، گلگت اور میرپور میں ویکسینیشن کی بہترین پیش رفت رپورٹ سامنے آئی ہے جبکہ سکردو، چارسدہ اور سرگودھا میں بھی اچھی پیش رفت ہوئی ہے۔

To ensure there is no 5th wave of covid we have to meet vaccination targets set. Otherwise despite sharp decline in cases we remain vulnerable, if large number of people remain unvaccinated. Remember that 2nd dose is vital for protection against covid. Get fully vaccinated

— Asad Umar (@Asad_Umar) October 21, 2021

تاہم، انہوں نے کہا کہ ضلعی انتظامیہ اور صحت ٹیموں کو حیدرآباد، نوشہرہ، فیصل آباد، کوئٹہ، کراچی، مینگورہ اور مردان میں ویکسینیشن کے عمل کو بہتر بنانے کی ضرورت ہے۔جبکہ پاکستان میں کورونا وائرس کی وبا کے باعث مزید 622 کیس رپورٹ ہوئے اور 16 افراد لقمہ اجل بن گئے۔

نیشنل کمانڈ اینڈ آپریشن سینٹر کے جاری کردہ اعدادوشمار کے مطابق گزشتہ 24 گھنٹوں کے دوران ملک میں مزید 16 اموات اور کورونا وائرس کے 622 نئے کیس رپورٹ ہوئے ہیں۔

مزید پڑھیں: کورونا کا زور ٹوٹ گیا، ملک میں 622 نئے مریض، 16 افراد جان سے گئے

گزشتہ 24 گھنٹوں کے دوران پاکستان بھر میں مجموعی طور پر 44،334 ٹیسٹ کیے گئے جبکہ مثبت کیسز کا تناسب 1.69 فیصد رہا۔ تاہم، ملک میں 1690 مریضوں کی حالت اب بھی نازک ہے اور سرکاری اعدادوشمار کے مطابق 1112 مریض وائرس سے صحت یاب ہو چکے ہیں۔