گوگل نیوز پر ہمیں فالو کریںاسلام آباد: ورلڈ بینک نے پاکستان کیلئے 15 کروڑ ڈالر فنڈز کی منظوری دے دی ہے جبکہ یہ رقم صوبہ پنجاب میں شعبۂ تعلیم میں بہتری کیلئے استعمال کی جائے گی۔
ترجمان عالمی بینک کا کہنا ہے کہ 15کروڑ ڈالرز کی رقم صوبہ پنجاب میں تعلیم کی سہولیات کی بہتری پر خرچ ہوگی، فنڈز کے استعمال سے 50 لاکھ بچوں کو فائدہ ہوگا، صوبہ پنجاب میں 70 لاکھ بچے اسکولوں سے باہر ہیں، اور یہ رقم ان بچوں کی تعلیم کی سہولیات کو بہتر بنائے گی۔
عالمی بینک کے اعلامیے میں مزید کہا گیا کہ پرائمری اسکولوں میں بچوں اور بچیوں کی انرولمنٹ ممکن بنائی جائے گی، بچے اور بچیاں پرائمری اور پری پرائمری گریڈز میں داخل ہو سکیں گے، کورونا کےدوران تعلیم کے شعبے کو پہنچنے والے نقصانات کا ازالہ کیا جائے گا، منصوبے پرعملدرآمد سے ایک لاکھ65ہزار اساتذہ، 7ہزار ہیڈماسٹرز کو فائدہ پہنچے گا۔
یاد رہے کہ اس سے قبل عالمی بینک نے داسو ڈیم کیلئے عالمی بینک نے ایک ارب ڈالر قرض کی منظوری دی، عالمی بینک کی جانب سے اضافی رقم کی فراہمی پاکستان میں ماحول دوست اور سستی پن بجلی پیدا کرنے کیلئے درکار فنڈنگ کے حوالے سے بہت بڑی پیشرفت سمجھی جارہی ہے۔
