اقوام متحدہ کے زیرِ اہتمام 18 دسمبر کو دنیا بھر میں عَرَبی زُبان کا عالمی دن منایا گیا۔

آخری آسمانی کتاب قُرآن کریم کی زُبان کے سامنے فصاحت و بلاغت کے ماہرین شَشدر نظر آتے ہیں۔ انسانی تہذیب اور ثقافتی ورثے کو محفوظ رکھنے میں اہم کردار ادا کرنے والی عرَبی زُبان کا تعلق سامی زُبانوں کے قبیلے سے ہے، اس کے حروفِ تہجیّ کی تعداد 28 ہے۔

عرَبی کو لُغتُ الضّاد یعنی حَرفِ ضاد کی زُبان بھی کہا جاتا ہے کیوں کہ بعض ماہرینِ لسانیات کے نزدیک دنیا کی کسی بھی اور زُبان میں ”ضاد“ کے تلفظ کا حَرف نہیں پایا جاتا۔

یہ بھی پڑھیں:

عربی زُبان اپنے وسیع اور جامع ادبی سرمائے کی وجہ سے دنیا کی چھ بڑی زُبانوں میں شمار ہوتی ہے، عربی کی حیات بخش قوّت، رسیلا پن اور گرامر کی جامعیت اسے دنیا کی تمام زُبانوں سے ممتاز کرتی ہے۔

عربی دنیا کے تقریبا 45 کروڑ افراد کی مادری زُبان ہے جبکہ دنیا کے پونے دو ارب مسلمان مذہبی حیثیت سے اس زُبان کا استعمال کرتے ہیں۔

عرَبی زُبان اردو سمیت دنیا کی کئی زُبانوں پر براہ راست یا بالواسطہ طور پر اثر انداز ہوئی۔ یہ اپنی خوبیوں کے سبب پوری دنیا کی مشترکہ زُبان کے طور پر اپنائی جا سکتی ہے۔

عرَبی زُبان خلیج تعاون کونسل، عرب لیگ، اسلامی تعاون تنظیم، افریقی یونین اور اقوام متحدہ کی سرکاری زُبانوں میں شامل ہے۔

1973 کے پاکستانی آئین میں آرٹیکل نمبر 31 شِق 2 (ب) کے مطابق حکومت کی ذمے داری بنتی ہے کہ وہ عربی زُبان کی ترویج واشاعت کی طرف توجہ دے۔