غربت کی کمی اور ملکی آمدنی میں اضافے کے لیے ہر ممکن قدم اُٹھائیں گے، وزیر اعظم

راولپنڈی: وزیراعظم عمران خان کی جانب سے اس عزم کا اعادہ کیا گیا ہے کہ پاکستان کو خود مختار بنانے کے لیے غربت کی کمی اور ملکی آمدنی میں اضافے کے لیے ہر ممکن قدم اُٹھائیں گے۔

وزیراعظم عمران خان نے ان خیالات کا اظہار اسلام آباد میں تین روزہ آئی سی ای سی نمائش کی اختتامی تقریب سے خطاب کرتے ہوئے کیا۔ اس موقع پر وزیراعظم نمائش کے ہر اسٹال پر گئے اور شرکاء سے گفتگو کی اور منتظمین کی کنونشن سینٹر کو ایکسپو سینٹر بنانے کی تجویز کو بھی سراہا۔

وزیراعظم عمران خان کا اپنے خطاب میں کہنا تھا کہ ملکی آمدنی نہ ہونے کی وجہ سے بار بار آئی ایم ایف کے پاس جانا پڑتا ہے اور شرائط ماننا پڑتی ہیں اس لیے پاکستان کو خود مختارملک بنانے کے لیے بہت ضروری ہے کہ غربت کا خاتمہ کیا جائے اور ملک کی آمدنی میں اضافہ کیا جائے۔

وزیراعظم نے اس موقع پر وژن پاکستان پروگرام کا اعلان کرتے ہوئے کہا کہ نچلے طبقے کیلئے یہ پروگرام لے کر آ رہے ہیں جس کے تحت غریب خاندان کے ایک فرد کو ٹیکنیکل ایجوکیشن فراہم کی جائے گی، جب کہ غریبوں اور چھوٹے کسانوں کو بغیر سود کے قرضے بھی فراہم کیے جائیں گے۔

وزیراعظم عمران خان نے اس موقع پر کہا کہ حکمرانوں کی کرپشن سے ملک غریب ہوجاتا ہے، ملک کا ایک چھوٹا سا طبقہ امیر ہوگیا لیکن ملک غریب ہوتا رہا اور اب ہمیں گندم کی ریکارڈ پیداوار کے باوجود گندم درآمد کرنا پڑتی ہے۔

وزیراعظم عمران خان نے غریبوں کے معیار زندگی کو بہتر بنانے کے لیے ہیلتھ کارڈ کی فراہمی، احساس پروگرام، گھروں کی تعمیر کے لیے قرضے اور کنسٹریکشن کے لیے سبسڈی سمیت دیگر حکومتی اقدامات سے متعلق بھی تفصیلاً سے بتایا۔

مزید پڑھیں: افغانستان میں امن سے متعلق وزیرخارجہ کابیان غلط طور پر پیش کیا گیا،دفتر خارجہ

وزیراعظم عمران خان کا اس موقع پر کہنا تھا کہ ایک وقت تھا کہ ملائیشیا اور دیگر ملکوں نے60 کی دہائی میں پاکستان سے بہت کچھ سیکھا۔ اس زمانے میں ہمارے پاس ٹاپ بینکرز تھے اور پاکستان کو ایشیا کے ٹائیگر سمجھا جاتا تھا۔