امارات کا خطے کوبیلسٹک میزائلوں سے پاک کرنے کا مطالبہ

ابوظہبی:متحدہ عرب امارات کے وزیر خارجہ شیخ عبداللہ بن زائد آل نہیان نے باور کرایا ہے کہ خطے کو وسیع تباہی کے ہتھیاروں اور بیلسٹک میزائلوں سے پاک کرنے کی ضرورت ہے۔

میڈیارپورٹس کے مطابق انہوں نے یہ بات ماسکو میں روسی وزیر خارجہ سرگئی لاروف کے ساتھ ایک مشترکہ پریس کانفرنس میں کہی۔ شیخ عبداللہ نے زور دیا کہ خطے میں دہشت گردی، انتہا پسندی اور نفرت سے نمٹنے کے لیے کام کرنا ہو گا۔

اس موقع پر سرگئی لاروف نے کہا کہ روس نے خلیج کے علاقے میں اعتماد کو مضبوط بنانے پر زور دیا ہے تا کہ امن کو یقینی بنایا جا سکے۔لیبیا کے حوالے سے اماراتی وزیر خارجہ نے باور کرایا کہ لیبیا کو بڑے چیلنجوں کا سامنا ہے اور شدت پسند جماعتیں سیاسی منظر نامے پر چھائی ہوئی ہیں۔

شیخ عبداللہ نے واضح کیا کہ ان کا ملک روس کے ساتھ جامع تزویراتی تعلقات رکھتا ہے۔ انہوں نے خطے میں روسی منصوبوں کا خیر مقدم کیا۔اماراتی وزیر خارجہ کے مطابق ان کا ملک اسپٹنک ویکسین کے تجربات کے حوالے سے روس کے ساتھ تعاون کر رہا ہے۔

لاروف نے بتایا کہ انہوں نے اماراتی وزیر خارجہ کے ساتھ خطے میں پیش رفت کے متعلق بات چیت کی۔ روسی وزیر خارجہ کے مطابق ان کا ملک کرونا کی وبا سے نمٹنے میں امارات کے ساتھ تعاون کا خواہاں ہے۔