گوگل نیوز پر ہمیں فالو کریںتیونس کی سمندری حدود میں غیرقانونی طور پر اٹلی جانے کی کوشش کرنے والے مہاجرین کی دو کشتیاں ڈوبنے سے کم ازکم 39 افراد جاں بحق جبکہ 165 مہاجرین کو بچالیا گیا۔
غیرملکی خبررساں ایجنسی کی رپورٹ کے مطابق تیونس کی وزارت دفاع نے ایک بیان میں کہا کہ مہاجرین اٹلی کے جزیرے لیمپیڈوسا کی جانب گامزن تھے کہ کشتیوں کو حادثہ پیش آگیا۔
وزارت دفاع کے ترجمان محمد ذکری کی جانب سے جاری بیان میں کہا گیا کہ صفاقس کے ساحل پر پیش آنے والے واقعے میں کوسٹ گارڈ نے 165 افراد کو بچالیا گیا جبکہ دیگر افراد کی تلاش کا کام جاری ہے۔
ان کا کہنا تھا کہ ہلاک تمام افراد کو تعلق افریقہ کے مختلف ممالک سے ہے۔
خیال رہے کہ تیونس کے ساحلی شہر صفاقس کے قریبی ساحلی پٹی افریقہ اور مشرق وسطیٰ سے بہتر مسقبل کی خاطر یورپ جانے کا بڑا مرکز ہے۔
تیونس کے سمندر میں 2019 میں تقریباً 90 افریقی مہاجرین ڈوب گئے تھے جب ان کی کشتی لیبیا سے یورپ کی جانب روانہ ہونے کے بعد حادثے سے دوچار ہوئی تھی اور یہ واقعہ تیونس کے حکام کے لیے بدترین حادثہ تھا جس سے ان کو نمٹنا پڑا تھا۔
یہ بھی پڑھیں : روس اور چین کا چاند پر مشترکہ خلائی اسٹیشن بنانے کا فیصلہ
