روس یوکرین تنازعہ، خلائی اسٹیشن کا ملبہ چین اور بھارت پر گرنے کا خدشہ

نئی دہلی / بیجنگ: یوکرین تنازعے کے باعث خلائی اسٹیشن کا ملبہ چین اور بھارت پر گرنے کا خدشہ سامنے آیا ہے جس کا وزن 500 ٹن ہے۔

بین الاقوامی خبر رساں ادارے کا کہنا ہے کہ روسی خلائی پروگرام کے سربراہ دیمتری روگوزین کے مطابق امریکا یوکرین پر فوجی آپریشن کے باعث روس پر پابندیاں عائد کررہا ہے۔ اگر روس خلائی پروگرام میں شریک نہ ہوا تو اس کے اثرات سنگین ہونگے۔

یہ بھی پڑھیں:

فیس بک اور ٹوئٹر نے بھی روس پر پابندیاں عائر کردیں

روسی خلائی پروگرام کے سربراہ نے کہا کہ امریکا کی عائد کی گئی پابندیوں کے باعث اگر ہم خلائی پروگرام میں شریک نہ ہوئے تو خلائی اسٹیشن مدار سے نکل سکتا ہے جس کے نتیجے میں 500 ٹن ملبہ چین اور بھارت پر گر جائے گا۔

واضح رہے کہ روس، امریکا، کینیڈا اور جاپان سمیت متعدد ممالک خلائی پروگرام میں حصہ لے رہے ہیں۔ امریکی صدر نے یوکرین پر حملے کے باعث روس پر پابندیاں عائد کردی ہیں جن کا دائرہ ہر گزرتے روز کے ساتھ وسیع ہورہا ہے۔

خلائی اسٹیشن چلانے کیلئے اسپیس پروگرام میں شریک تمام اقوام کا تعاون ضروری ہے۔ روس کا کہنا ہے کہ اگر امریکی مزید تعاون نہیں کرتے تو اسٹیشن بے قابو ہوجائے گا۔ بھارت اور چین کے علاوہ یہ امریکہ یا یورپ میں بھی گر سکتا ہے۔