اُردو کا لفظ ’اچھا‘ کیمبرج ڈکشنری میں شامل کرلیا گیا

لندن: مشہور و معروف کیمبرج ڈکشنری نے روز مرہ کی زندگی میں استعمال ہونے والا لفظ ’اچھا‘ کو اپنی ڈکشنری میں شامل کرلیا ہے۔

یقینی طور پر پاکستان میں عوام دن میں متعدد بار لفظ ’اچھا‘ کا استعمال کرتے ہوں گے، کبھی کوئی نصیحت کرے تو فوراً سے کہہ دیا جاتا ہے کہ ’اچھا‘ کوئی واقعہ بیان کیا جائے تو سننے والا اس میں بھی متعدد بار لفظ ’اچھا‘ کا استعمال کرتا ہے۔

لیکن آج اس لفظ کے حوالے سے ایک بات یہ سامنے آئی کہ کیمبرج نے لفظ ’اچھا‘ کو اپنی ڈکشنری میں شامل کرلیا ہے، ڈکشنری میں اس لفظ کا مطلب حیران یا خوشی کا اظہار کرنے کے معنیٰ میں استعمال کیا گیا ہے۔

واضح رہے کہ کیمبرج ڈکشنری کی جانب سے لفظ ’کورنٹائین‘ (قرنطینہ) کو سال 2020 کا لفظ قرار دیا ہے، کیمبرج کے مطابق ’کورنٹائین‘ کو تیسرے نمبر پر سب سے زیادہ سرچ کیا گیا ہے۔جس کی وجہ سے ڈکشنری میں جگہ مل پائی۔