بی جے پی رہنما نوپور شرما کی نبی کریم ﷺ کی شان میں گستاخی، رہنما کو پولیس نے طلب کرلیا

ممبئی: بھارت کی حکمراں جماعت بھارتیہ جنتا پارٹی کی رہنما نوپور شرما کی نبی کریم ﷺ کی شان میں گستاخی کرنے پر پارٹی رہنما کو ممبئی پولیس نے طلب کرلیا۔

بھارتی میڈیا کی رپورٹس کے مطابق ممبئی پولیس کے کمشنر سنجے پانڈے نے کہا کہ بی جے پی کی معطل رہنما نوپور شرما کو توہین آمیز بیان کے الزام میں درج ایف آئی آر کے سلسلے میں اپنا بیان ریکارڈ کرنے کے لیے طلب کیا ہے۔

ممبئی پولیس کے کمشنر سنجے پانڈے نے پریس کانفرنس سے خطاب کرتے ہوئے کہا کہ ’پائیدھونی پولیس اسٹیشن میں نوپور شرما کے خلاف پہلے ہی ایف آئی آر درج کی گئی تھی، ہم اُنہیں قانون کے مطابق بیان ریکارڈ کرنے کے لیے بلائیں گے اور قانونی طریقہ کار پر عمل کیا جائے گا۔

یہ بھی پڑھیں: گستاخانہ بیان پر معذرت ہی معذرت، بھارت کا 75سالہ ریکارڈ ٹوٹ گیا۔اشوک سوائن

واضح رہے کہ بی جے پی کی معطل رہنما نوپور شرما کو 5 جون کو پیغمبرِ اسلام ﷺ کے خلاف مبینہ طور پر توہین آمیز ریمارکس پر بی جے پی سے معطل کر دیا گیا تھا۔

بی جے پی ترجمان نوپور شرما نے ایک ٹی وی چینل پر اسلام اور پیغمبرِ اسلام حضرت محمدﷺ کی شان اقدس میں گستاخانہ گفتگو کی تھی۔

دوسری جانب بھارتی رہنما کے نبی کریم صلی اللہ علیہ وآلہ وسلم کی شان میں گستاخی کرنے پر بھارت اور مسلم ممالک میں شدید احتجاج کیا جارہا ہے اور متعدد عرب ممالک میں ’بائیکاٹ انڈیا‘ مہم بھی چل پڑی ہے۔

غیر ملکی میڈیا کی رپورٹ کے مطابق مصر، سعودی عرب اور کویت میں بائیکاٹ انڈیا کی مہم شروع ہوگئی ہے۔