گوگل نیوز پر ہمیں فالو کریںسیر و تفریح کے ارادے سے نکلنے والی ایک فیملی کے لیے شمالی علاقہ جات کی سیر موت کا پیغام لے آئی۔ نجی ٹی وی چینل کی اینکر پرسن شبانہ ان کے شوہر لیاقت علی اور تین معصوم بچے بابوسر ٹاپ کے علاقے میں پیش آنے والے حادثے میں جاں بحق ہو گئے۔
سینیئر صحافی مقدس فاروق اعوان نے سماجی رابطے کی ویب سائٹ ایکس (ٹوئٹر) پر اپنی ایک پوسٹ میں دعویٰ کیا ہے کہ خیبر ٹی وی کی چینل کی خاتون اینکر حادثے میں 3 بچوں اور شوہر سمیت جاں بحق ہو گئیں۔
نجی ٹی وی کی چینل کی خاتون اینکر حادثے میں 3 بچوں اور شوہر سمیت جاں بحق ہو گئیں
— Muqadas Farooq Awan (@muqadasawann) July 27, 2025
خاندانی ذرائع کے مطابق اینکر پرسن شبانہ اپنے اہل خانہ کے ہمراہ 21 جولائی کو بابوسر ٹاپ سیاحت کے لیے روانہ ہوئی تھیں مگر کچھ ہی دیر بعد ان سے مکمل رابطہ منقطع ہو گیا۔ کئی روز تک کسی قسم کی خبر نہ ملنے پر جب تلاش کا عمل شروع ہوا تو خدشہ ظاہر کیا گیا کہ گاڑی کسی قدرتی آفت یا حادثے کا شکار ہوچکی ہے۔
ذرائع کے مطابق ابتدائی طور پر شبانہ ان کے شوہر لیاقت، بچوں ایمل، ایمان اور دو دیگر افراد کے پراسرار طور پر لاپتہ ہونے کی اطلاع ملی۔ واقعے کی سنگینی کو دیکھتے ہوئے ریسکیو ٹیموں نے جدید ٹیکنالوجی، ڈرونز اور سراغ رساں کتوں کی مدد سے سرچ آپریشن شروع کیا۔ کئی گھنٹے کی کوششوں کے بعد حادثے کی تصدیق ہو گئی۔
مقامی انتظامیہ کا کہنا ہے کہ بابوسر ٹاپ کے دشوار گزار اور غیر متوقع موسم میں اکثر سیاح حادثات کا شکار ہو جاتے ہیں اور موجودہ واقعہ بھی ایک ممکنہ قدرتی آفت یا گاڑی کے بہہ جانے کا نتیجہ ہو سکتا ہے۔
مرحومہ شبانہ طویل عرصے سے نجی ٹی وی چینل سے وابستہ تھیں اور اپنی ذمہ دارانہ صحافت اور نرم مزاجی کے لیے جانی جاتی تھیں۔ ان کے انتقال پر میڈیا انڈسٹری، ساتھی صحافیوں اور عوامی حلقوں میں گہرے دکھ اور صدمے کی لہر دوڑ گئی ہے۔
