ترکی میں بغیر ڈرائیور کے چلنے والی منفرد بس کا کامیاب تجربہ

انقرہ: سائنس کی دنیا میں ایک انوکھا کارنامہ، ترکی نے بجلی سے چلنے والی تیز رفتار مسافر بس کا کامیاب تجربہ کیا گیا ہے جس کی سب سے خاص بات یہ ہے اس بس کو کسی ڈرائیور کی ضرورت نہیں۔

بین الاقوامی خبر رساں ادارے کے مطابق ترک صدر رجب طیب اردوان نے مقامی کمپنی کارسن اتک الیکٹرک کی ڈرائیور کے بغیر چلنے والی پہلی برقی بس کا افتتاح کیا جاچکا ہے.

ڈرائیور کے بغیر چلنے والی الیکٹرک بس کی تقریب میں ترک صدر سمیت اعلیٰ حکام اور غیر ملکی سفارت کاروں نے بھی شرکت کی۔

ترکی کے صدر نے اپنی ٹیم کے ہمراہ بس کا سفر بھی کیا اور بس کی تعریف کی۔ کامیاب تجربے کے بعد کمپنی کارسن اب بس کی بڑے پیمانے پر تیاری کا آغاز کرے گی۔

دوسری جانب ڈرائیور کے بغیر چلنے والی الیکٹرک بس بنانے والی کمپنی کارسن کی ویب سائٹ پر موجود تفصیلات سے ظاہر ہوتا ہے کہ بی ایم ڈبلیو کی 220 کلو واٹ بیٹریوں کی وجہ سے یہ بس بغیر رکاوٹ 300 کلو میٹر تک سفر کرسکتی ہے۔

کمپنی کے مطابق 27 فٹ لمبی بس میں 50 مسافروں کے بیٹھنے کی جگہ ہے جب کہ بیٹری کو 5 گھنٹوں میں AC کے ذریعہ یا 3 گھنٹے میں ڈی سی کے ذریعے چارج کیا جا سکتا ہے۔

ترکی کی ایک اور آٹوموبائل کمپنی اوٹوکر نے بھی گزشتہ ماہ ایک خود مختار برقی بس کا تجربہ کیا تھا جب کہ ایک سال قبل الیکٹرک کار کا بھی کامیاب تجربہ کیا جا چکا ہے۔