گوگل نیوز پر ہمیں فالو کریںاسٹیٹ بینک آف پاکستان نے تمام کرنسی نوٹ تبدیل کرنے کا اعلان کر دیا ہے۔
گورنر اسٹیٹ بینک جمیل احمد نے اپنے بیان میں کہا ہے کہ دس روپے سے لیکر 5 ہزار روپے تک کے تمام کرنسی نوٹ تبدیل کیے جائیں گے۔
قومی اسمبلی کی قائمہ کمیٹی برائے خزانہ کے اجلاس میں بریفنگ کے دوران گفتگو کرتے ہوئے گورنر اسٹیٹ بینک نے کہا کہ تمام کرنسی نوٹ دسمبر تک تبدیل کردیے جائیں گے۔
گورنر اسٹیٹ بینک نے ارکان اسمبلی کے مختلف سوالات کا جواب دیتے ہوئے کہا کہ نئے ڈیزائن کے کرنسی نوٹ دسمبر میں آجائیں گے۔
انہوں نے اپنی گفتگو میں مزید بتایا کہ کاغذ کے نوٹ تبدیل کیے جا رہے ہیں۔ ان کا کہنا تھا کہ نئے کرنسی نوٹوں میں ایک نوٹ پلاسٹک کا بھی ہوگا۔
گورنر اسٹیٹ بینک نے قائمہ کمیٹی خزانہ کو بتایا کہ نئے کرنسی نوٹوں پر کام کررہے ہیں، دیکھیں گے کہ پلاسٹک نوٹوں کی لائف کتنی ہوتی ہے، اس سال کے آخر تک نئے نوٹوں کی ایکسرسائز مکمل کرلیں گے۔.
گورنر اسٹیٹ بینک کا کہنا تھا کہ تمام کرنسی نوٹوں کو تبدیل کیا جائےگا۔ ممبر کمیٹی شاہ زیب درانی کا کہنا تھا کہ ہم پلاسٹک کے خاتمے پرکام کر رہے ہیں اور آپ پلاسٹک کرنسی لانا چاہتے ہیں۔ گورنر اسٹیٹ بینک نے بتایا کہ ہم پلاسٹک کرنسی کو ٹیسٹ کریں گے، عوام نے قبول کیا تو جاری کریں گے۔
رکن کمیٹی سینیٹر محسن عزیز کا کہنا تھا کہ 5 ہزارکا نوٹ کرپشن کی جڑ ہے، جہاں کرپشن ہے وہاں 5 ہزار کا نوٹ ہے،5 ہزار کے نوٹ تکیوں کے نیچے اور تہہ خانوں میں ہوتے ہیں، اگر 5 ہزار کا نوٹ ختم کردیں تو یہ سلسلہ رک سکتا ہے، جب 5 ہزار کا نوٹ جاری کیا گیا تب اس کی ویلیو بہت زیادہ تھی۔
