ازبکستان کے صدر شوکت مرزایوف 2 روزہ دورے کیلئے پاکستان پہنچ گئے

اسلام آباد: ازبکستان کے صدر شوکت مرزایوف 2 روزہ دورے کیلئے پاکستان پہنچ گئے ہیں، وزیر اعظم عمران خان نے معزز مہمان کا استقبال کیا۔

تفصیلات کے  مطابق ازبکستان کے صدر شوکت مرزایوف وزیر اعظم عمران خان کی دعوت پر پاکستان پہنچے ہیں۔ وزیر اعظم نے وفاقی وزراء کے ہمراہ صدر شوکت مرزایوف کا استقبال کیا اور انہیں پاکستان میں خوش آمدید کہا۔

یہ بھی پڑھیں:

پاکستان اپنے پڑوسیوں کے ساتھ پرامن اور قریبی تعلقات کا خواہاں ہے، آرمی چیف

ازبکستان کے صدر شوکت مرزایوف کے ہمراہ اعلیٰ سطح کا سرکاری وفد بھی پاکستان پہنچ گیا۔ ازبک وزیر خارجہ سمیت دیگر حکومتی و کاروباری شخصیات اور ذرائع ابلاغ کے نمائندے بھی وفد کا حصہ ہیں۔

پاکستان اور ازبکستان کے مابین تعلقات گزشتہ کچھ برس سے تعطل کا شکار رہے ہیں۔ 2016 میں منصب سنبھالنے کے بعد ازبک صدر پہلی بار پاکستان کا دورہ کر رہے ہیں جو پاک ازب تعلقات کے آغاز کی تیسویں سالگرہ پر ہورہا ہے۔

دوروزہ دورۂ پاکستان کے موقعے پر ازبک صدر وزیر اعظم عمران خان اور صدرِ مملکت ڈاکٹر عارف علوی سمیت دیگر اعلیٰ حکام سے ملاقاتیں کریں گے۔ دونوں ممالک کے مابین سیاسی و تجارتی اور معاشی تعلقات اور دو طرفہ تعاون پر تبادلۂ خیال کیا جائے گا۔