لاہور قلندرز نے شروع سے عزت دی۔شاہین آفریدی کا کپتان بننے پر اظہارِ تشکر

پاکستان کرکٹ ٹیم کے فاسٹ بالر شاہین آفریدی نے پی ایس ایل 7 میں لاہور قلندرز کا کپتان بننے پر تشکر کا اظہار کرتے ہوئے کہا ہے کہ قلندرز نے شروع سے عزت دی ہے۔ جس ٹیم کی نمائندگی شروع کی تھی، اس کی کپتانی کا موقع ملا ہے۔ اچھا پرفارم کرنے کی ہمیشہ سے کوشش رہی ہے۔

تفصیلات کے مطابق فاسٹ بالر شاہین آفریدی نے کہا کہ میرے لیے لاہور کی کپتانی اعزاز کی بات ہے۔ قلندرز کے لڑکوں کو آگے لے کر جانے کی کوشش ہوگی۔ بولنگ اور کپتانی دونوں میں بہترین کارکردگی کا مظاہرہ کروں گا۔

یہ بھی پڑھیں:

کوہلی کا رویہ بہت پسند ہے، تاہم وہ لڑتے بہت ہیں، سارو گنگولی

سانحہ اے پی ایس ایک بد ترین یادداشت جیسا ہے، شاہین شاہ آفریدی

گزشتہ روز لاہور ٹیم کی انتظامیہ نے قومی ٹیم کے فاسٹ بالر کو کپتان مقرر کیا تھا۔ شاہین آفریدی کا کہنا ہے کہ قلندرز کے اوپنرز اور مڈل آرڈر بہت اچھا ہے۔ پی ایس ایل 7 کیلئے مختلف نقائص کو دور کیا گیا ہے۔

شاہین شاہ آفریدی نے کہا کہ بالرز کپتانی نہیں کرسکتے، یہ نہیں سمجھا جانا چاہئے۔ قومی ٹیم کے سابق کپتانوں میں فاسٹ بالر وسیم اکرم اور وقار یونس سمیت کئی کھلاڑیوں نے کپتانی کا اعزاز حاصل کیا۔

خیال رہے کہ پاکستان کرکٹ بورڈ پی ایس ایل 7 کی تیاریوں میں مصروف ہے، اس دوران فرنچائزز نے تجویز پیش کی کہ سپر لیگ کیلئے پورا ہوٹل بک کرلیا جائے تاکہ کھلاڑیوں کو کوئی مشکل نہ ہو۔

اس حوالے سے ڈائریکٹر لاہور قلندرز عاقب جاوید کا کہنا ہے کہ ون ڈے سیریز ملتوی ہونا افسوسناک ہے، تاہم پی ایس ایل 7 کو محفوظ بنانا چاہئے۔ پی سی بی کیلئے بڑا چیلنج بہترین انتظامات ہیں۔