کورونا کا خطرہ، پی ایس ایل 7 میں شائقین کی تعداد کم کرنے کا امکان

کراچی: ملک میں کورونا وائرس کے کیسز میں اضافے کی وجہ سے پاکستان سپرلیگ 7 کے دوران میدان میں شائقین کی تعداد کم کرنے کا امکان ہے جبکہ افتتاحی تقریب میں اس بار میوزک اوررقص نہیں ہوگا۔

پاکستان کرکٹ بورڈکے ذرائع کے مطابق پاکستان سپرلیگ میں اس بارروایتی رنگا رنگ تقریب کے بجائے افتتاحی تقریب سادگی سے کرنے کا فیصلہ کیا گیا ہے۔ افتتاحی تقریب میں میوزک اوررقص نہیں ہوگا۔

پی سی بی ذرائع کے مطابق کووڈ کی صورتحال اورلاجسٹک مسائل کے باعث گزشتہ ایڈیشنز کے برعکس 27 جنوری کوکراچی کے نیشنل اسٹیڈیم میں میچز کے آغاز سے قبل کلچرل سرگرمیاں نہیں ہوں گی۔

مختصر افتتاحی تقریب میں چیئرمین پی سی بی رمیز راجا خطاب کریں گے جس کے بعد میچز کا آغاز ہوجائے گا۔پی ایس ایل 7 کا ترانہ 20 یا 21 جنوری تک ریلیز کردیا جائے گا۔پی سی بی حکام اس حوالے سے پروگرام کوحتمی شکل دے رہے ہیں۔

مزید پڑھیں:پاکستان سپرلیگ 7 کے ٹکٹوں کی آن لائن فروخت شروع

ذرائع کا کہنا ہے کہ نیشنل کمانڈ اینڈ آپریشن سینٹر نے ملک میں جاری کورونا کی صورتحال پر دوبارہ غور شروع کردیا ہے اور کیسز میں اضافے کی وجہ سے شائقین کی تعداد مختصر کی جاسکتی ہے۔

واضح رہے کہ این سی او سی نے ملک میں کوروناکیسز میں کمی کے بعد ویسٹ انڈین ٹیم کے دورہ پاکستان اور پی ایس ایل 7 کیلئے شائقین کو میدان میں جاکر میچز دیکھنے کی اجازت دی تھی جس پر اب نظر ثانی کا امکان ہے۔