گوگل نیوز پر ہمیں فالو کریںبھارت کی ریاست ہماچل پردیش میں مون سون کی موسلادھار بارشوں نے شدید تباہی مچا رکھی ہے۔ ریاستی ڈیزاسٹر مینجمنٹ اتھارٹی (SDMA) کی رپورٹ کے مطابق 20 جون سے جاری مون سون کے باعث لینڈسلائیڈنگ، سیلاب، کلاؤڈ برسٹ اور دیگر حادثات میں اب تک 106 افراد ہلاک ہو چکے ہیں۔
بارشوں کی شدت کی وجہ سے 62 افراد مختلف قدرتی آفات جیسے لینڈسلائیڈ، سیلاب، کرنٹ لگنے اور ڈوبنے کے واقعات میں جان کی بازی ہار گئے، جب کہ سڑک حادثات میں 44 مزید افراد اپنی جان سے ہاتھ دھو بیٹھے ہیں۔
رپورٹ میں بتایا گیا ہے کہ اس تباہی نے 293 پکے اور 91 کچے مکانات کو مکمل طور پر تباہ کر دیا ہے، جبکہ 850 ایکڑ سے زائد زرعی اراضی بھی متاثر ہوئی ہے۔ اس کے علاوہ سرکاری املاک کو بھی بھاری نقصان پہنچا ہے، جس میں سڑکیں، بجلی، پانی، صحت اور تعلیمی ادارے شامل ہیں۔ نقصان کی مالیت تقریباً 81 کروڑ روپے سے تجاوز کر چکی ہے۔
حکومت اور انتظامیہ نے عوام کو الرٹ رہنے کی ہدایت کی ہے اور حفاظتی اقدامات پر سختی سے عمل کرنے کی اپیل کی ہے تاکہ مزید جانی و مالی نقصان سے بچا جا سکے۔
