گوگل نیوز پر ہمیں فالو کریںپنجاب بھر کے تمام تعلیمی بورڈز کے سالانہ میٹرک امتحانات کے نتائج 24 جولائی 2025 کو ایک ساتھ جاری کیے جائیں گے۔
ذرائع کے مطابق یہ فیصلہ پنجاب بورڈز کمیٹی آف چیئرمینز کے اجلاس میں کیا گیا ۔ اجلاس میں صوبے کے تمام بورڈز کے سربراہان نے شرکت کی۔
نتائج کے اعلان میں تاخیر کی بنیادی وجہ امتحانی پرچوں کی جانچ کا مکمل نہ ہونا بتائی گئی ہے جس سے تمام بورڈز میں نتائج کی تیاری کے عمل پر اثر پڑا۔ تعلیمی حکام اس عمل کو بروقت مکمل کرنے کے لیے کوششیں کر رہے ہیں تاکہ مقررہ تاریخ پر نتائج فراہم کیے جا سکیں۔
دوسری جانب بورڈ آف انٹرمیڈیٹ اینڈ سیکنڈری ایجوکیشن راولپنڈی نے ایچ ایس ایس سی پارٹ اوّل کا تاریخِ اسلام کا پرچہ منسوخ کر دیا ہے۔ اس فیصلے کی وجہ طلبہ کی جانب سے آنے والی وہ شکایات تھیں جن میں کہا گیا کہ پرچے میں شامل کئی سوالات نصاب سے باہر تھے۔
طلبہ کے فوری احتجاج کے بعد نگران عملے نے بورڈ کو آگاہ کیا، جس پر راولپنڈی بورڈ نے طلبہ کے تعلیمی مفاد کو مدنظر رکھتے ہوئے پرچہ منسوخ کرنے کا فیصلہ کیا۔
منسوخ شدہ پرچہ اب منگل، 17 جون 2025 کو پہلے گروپ میں، اسی امتحانی مرکز اور رول نمبر کے تحت دوبارہ لیا جائے گا۔
اس فیصلے کو والدین اور اساتذہ نے سراہا ہے، جن کا کہنا ہے کہ نصاب سے ہٹ کر سوالات دینا نہ صرف غیر منصفانہ ہے بلکہ طلبہ کے اعتماد کو بھی مجروح کرتا ہے۔
تعلیمی اداروں کو چاہیے کہ وہ نصاب کی حدود کے اندر رہ کر پرچے تیار کریں تاکہ طلبہ کی محنت ضائع نہ ہو۔
