آج بلدیاتی قانون کیخلاف پی ٹی آئی کا احتجاج، خواتین پارلیمنٹرینز بھی کراچی پہنچ گئیں

کراچی: بلدیاتی قانون کے خلاف تحریک انصاف اور اپوزیشن جماعتیں احتجاج کریں گی، پی ٹی آئی کی 16 خواتین ارکان قومی اسمبلی وفاقی وزیر علی زیدی کے ہمراہ آج مظاہرے میں شرکت کیلئے کراچی پہنچ گئیں۔

ذرائع کے مطابق متحدہ اپوزیشن کی جانب سے پریس کلب پر سندھ حکومت کے خلاف احتجاج کیلئے انتظامات کو حتمی شکل دے دی گئی ہے۔ متحدہ اپوزیشن ذرائع نے بتایاکہ کارکنان قافلے کی صورت میں مارچ کرتے ہوئے شاہراہ قائدین، شاہراہ پاکستان اور شارع فیصل سے ہوتے ہوئے پریس کلب پہنچیں گے۔

سندھ حکومت بلدیاتی ایکٹ اور متنازعہ حلقہ بندیوں کے خلاف آج ہونے والے احتجاج میں اپوزیشن جماعتیں تحریک انصاف اور گرینڈ ڈیموکریٹ الائنس بھی شریک ہوں گی۔ متحدہ اپوزیشن کے مطابق ہفتہ کوسندھ حکومت کیخلاف نئے معرکے کا آغاز ہوگا اور یہ احتجاج پیپلزپارٹی کی آنکھیں کھول دے گا کہ کون اکثریت ،کون اقلیت میں ہے۔

مزید پڑھیں:نیپراعوام کی جیبوں پر ڈاکے مار نا بند کرے، مفتی قاسم فخری

احتجاج میں شرکت کیلئے پی ٹی آئی کی 16 خواتین ارکان قومی اسمبلی وفاقی وزیر علی زیدی کے ہمراہ اسلام آباد سے کراچی پہنچ گئیں۔ علی زیدی نے کہا کہ خواتین ارکان قومی اسمبلی کراچی پریس کلب پر احتجاج میں شرکت کے لیے کراچی پہنچی ہیں،آج کا احتجاج صوبے کے حکمرانوں کی نیندیں حرام کردے گا۔

انہوں نے کہا کہ کراچی کے شہریوں کی بڑی تعداد ہفتہ کو ہونے والے احتجاج میں شرکت کرے گی۔سندھ کے نا اہل حکمرانوں کو بتا دیں گے کہ کراچی کے عوام اپنے حقوق کے دفاع کے لیے کھڑے ہوگئے ہیں۔

ہم کسی صورت عوام کے حقوق پر زرداری مافیا کو قابض نہیں ہونے دیں گے۔علی زیدی نے کہا کہ سندھ حکومت کے مسلط کردہ کالا قانون کے خلاف تحریک اب رکنے والی نہیں۔ہفتہ کو میڈیا سے گفتگو میں اہم اعلان کروں گا۔