پی ٹی آئی کا پورا ٹولہ اپنے سربراہ سمیت جھوٹا پروپیگینڈا کرتا ہے، رانا ثناء اللہ

لاہور: وفاقی وزیر داخلہ رانا ثناء اللہ نےکہا ہے کہ پاکستان تحریک انصاف کا پورا ٹولہ اپنے سربراہ سمیت جھوٹا پروپیگینڈا کرتا ہے۔

تفصیلات کے مطابق لاہور میں میڈیا سے گفتگو کرتے ہوئے وفاقی وزیرِ داخلہ رانا ثناء اللہ نے کہا کہ یہ ایک ایسا بدبخت ٹولہ ہے جو مسلسل جھوٹ بول کر قوم کو گمراہ کررہا ہے۔

انہوں نے کہا کہ گزشتہ 3 روز میں ان کے بیانات اٹھا کر دیکھ لیں کہ کس طرح ان کی پوری قیادت دعوے کررہی تھی کہ کروڑوں کی آفریں کی جارہی ہیں، پیسہ چلا ہے، ہمارے بندے توڑے جارہے ہیں لیکن کل جو اعداد و شمار سامنے آئے اس کے بعد پی ٹی آئی بتائے کہ پیسہ کہاں چلا ہے؟ کیا چوہدری شجاعت نے پیسے لیے؟

وزیر داخلہ نے کہا کہ کل کے اعداد و شمار سے ثابت ہوگیا کہ پی ٹی آئی کا یہ پورا ٹولہ اپنے سربراہ سمیت جھوٹا پروپیگینڈا کرنے کا ماہر ہے، ان کی کسی بات کو بھی تسلیم نہیں کرنا چاہیے۔

یہ بھی پڑھیں:

مسلم لیگ ق کے ووٹ شمار ہونے چاہیے یا نہیں؟ قانونی ماہرین کیا کہتے ہیں؟

رانا ثناء اللہ کا کہنا تھا کہ کل ان لوگوں نے سپریم کورٹ کی رجسٹری پر آکر ہنگامہ کیا، دیواریں پھلانگی گئیں، دفاتر میں زبردستی داخل ہوئے، یہ بات انتہائی قابل افسوس ہے کہ ان کے خلاف کارروائی کرنے کی بجائے ان کی درخواست جمع کرنے کے لیے ڈپٹی رجسٹرار وہاں پہنچ کر دفتر کھول کر بیٹھ گئے جبکہ درخواست کئی گھنٹوں بعد تیار ہو کر وہاں پہنچی۔

انہوں نے کہا کہ جب کوئی فیصلہ ان کے خلاف آتا ہے تو یہ عدالت پر تنقید شروع کردیتے ہیں کہ عدالتیں رات 12 بجے کیوں کھولی گئیں اور پھر اس کے بعد ان کے لیے عدالتیں رات 12 بجے کھلنا شروع ہوجاتی ہیں۔

وزیر داخلہ نے مزید کہا کہ یہ اداروں اور اسٹیبلشمنٹ کو بھی گالیاں دیتے ہیں اور الیکشن جیت کر بھی الیکشن کمیشن پر تہمتیں لگاتے ہیں جبکہ الیکشن کمیشن ان کے خلاف فارن فنڈنگ کیس کا فیصلہ سنانے کے لیے اب تک تیار نہیں، اس سے عوام میں یہ تاثر جاتا ہے کہ ان کے ہتک آمیز رویے کی وجہ سے اداروں میں بیٹھے لوگ رعایت برت رہے ہیں۔

انہوں نے کہا کہ میں الیکشن کمیشن سے مطالبہ کرتا ہوں کہ فارن فنڈنگ کیس کا فوری فیصلہ سنایا جائے اور پھر اس کے مطابق ان کے خلاف کارروائی کی جائے۔