گوگل نیوز پر ہمیں فالو کریںوزیراعظم شہباز شریف نے یومِ تکبیر کے موقع پر اپنے پیغام میں کہا ہے کہ پاکستان کو ایٹمی طاقت بنے 27 برس مکمل ہوگئے ہیں، یہ دن اس مرتبہ ایک تاریخی کامیابی کے پس منظر میں منایا جا رہا ہے۔
وزیراعظم نے بھارت کے حالیہ حملے کو پسپا کرنے پر قوم کو مبارکباد دی اور کہا کہ 1998 میں نواز شریف نے دباؤ کے باوجود چھ ایٹمی دھماکے کر کے پاکستان کی خودمختاری کا دفاع کیا۔
انہوں نے سابق وزیراعظم ذوالفقار علی بھٹو، ڈاکٹر عبدالقدیر خان، سائنسدانوں، انجینئرز، افواج پاکستان اور دیگر اداروں کو سلام پیش کیا اور کہا کہ چاغی کے پہاڑوں سے بلند ہونے والی “اللہ اکبر” کی صدا آج بھی قومی عزم کی علامت ہے۔
صدر مملکت آصف علی زرداری نے بھی قوم کو مبارکباد دیتے ہوئے کہا کہ 28 مئی پاکستان کے تزویراتی دفاعی طاقت حاصل کرنے کا دن ہے۔ انہوں نے ایٹمی پروگرام کے معماروں کو خراج عقیدت پیش کرتے ہوئے کہا کہ پاکستان کی جوہری صلاحیت امن، خودمختاری اور قومی سلامتی کی ضامن ہے۔
صدر نے زور دیا کہ پاکستان جنگ نہیں چاہتا بلکہ پرامن بقائے باہمی پر یقین رکھتا ہے۔ یومِ تکبیر ہمیں اپنے دفاع، اتحاد اور خودمختاری کے تحفظ کا عہد یاد دلاتا ہے۔
