گوگل نیوز پر ہمیں فالو کریںوفاقی حکومت آئندہ مالی سال کے بجٹ میں اسلام آباد میں چلنے والی رائیڈ ہیلنگ (آن لائن ٹیکسی) سروسز پر سیلز ٹیکس عائد کرنے پر غور کر رہی ہے۔
پروپاکستانی نے ذرائع کے حوالے سے رپورٹ کیا ہے کہ فیڈرل بورڈ آف ریونیو (ایف بی آر) مالی سال 2025-26 کے بجٹ میں وفاقی دارالحکومت اسلام آباد میں کام کرنے والے کیب ایگریگیٹرز پر 4 فیصد ٹیکس متعارف کرانے پر سنجیدگی سے غور کر رہا ہے۔
اس وقت وفاقی دارالحکومت میں کام کرنے والی رائیڈ ہیلنگ سروسز پر کوئی سیلز ٹیکس عائد نہیں ہے۔ دوسری جانب پنجاب، سندھ ریونیو بورڈ اور خیبر پختونخوا ریونیو اتھارٹی جیسے صوبائی محکمے پہلے ہی ان سروسز پر 5 فیصد سیلز ٹیکس وصول کر رہے ہیں۔
ذرائع کے مطابق ایف بی آر نے موجودہ مالی سال کے بجٹ میں بھی ان سروسز پر سیلز ٹیکس عائد کرنے کی تجویز دی تھی، لیکن آخری لمحات میں اسے فنانس بل سے خارج کر دیا گیا تھا۔
پاکستان میں مختلف شہروں میں کئی رائیڈ ہیلنگ کمپنیاں کام کر رہی ہیں، جن میں ان ڈرائیو، کریم، بائیکیا، جگنو اور یانگو شامل ہیں۔
