گوگل نیوز پر ہمیں فالو کریںلاہور سمیت پنجاب کے بیشتر علاقے شدید گرمی اور بڑھتی ہوئی نمی کی لپیٹ میں آ گئے ہیں جبکہ خشک موسم کی صورتحال برقرار ہے۔
محکمہ موسمیات پاکستان (پی ایم ڈی) کے مطابق لاہور میں زیادہ سے زیادہ درجہ حرارت 34 ڈگری سینٹی گریڈ اور کم سے کم 27 ڈگری سینٹی گریڈ رہنے کا امکان ہے۔
اگرچہ آج سے ایک نیا مون سون سسٹم پاکستان میں داخل ہو رہا ہے تاہم لاہور میں فوری طور پر کسی بڑی بارش کی توقع نہیں۔
محکمہ موسمیات نے خبردار کیا ہے کہ رواں سال کا چوتھا مون سون اسپیل گزشتہ تمام اسپیلز سے زیادہ شدید ہو سکتا ہے جس کے دوران راولپنڈی، مری، فیصل آباد، گوجرانوالہ اور جنوبی پنجاب کے مختلف علاقوں میں تیز بارش، گرج چمک اور آندھی کی توقع ہے۔
پنجاب کی صوبائی ڈیزاسٹر مینجمنٹ اتھارٹی (پی ڈی ایم اے) نے 20 جولائی سے 25 جولائی کے دوران ممکنہ شدید بارشوں اور سیلاب کے خدشے کے پیش نظر ہنگامی الرٹ جاری کر دیا ہے اور مقامی انتظامیہ کو چوکنا رہنے کی ہدایت کی ہے۔
دریائے راوی، جہلم، ستلج اور چناب میں پانی کی سطح بلند ہونے کا امکان ہے، جبکہ دریائے سندھ میں درمیانے درجے کے سیلاب کی اطلاعات موصول ہوئی ہیں۔
سیلاب سے ممکنہ نقصانات کو قابو میں رکھنے کے لیے صوبائی ادارے جیسے واسا، ایل ڈبلیو ایم سی اور دیگر بلدیاتی ادارے متحرک ہو چکے ہیں اور دریاوں و ندی نالوں کے اطراف دفعہ 144 نافذ کر دی گئی ہے تاکہ عوام کی حفاظت یقینی بنائی جا سکے۔
محکمہ موسمیات کے مطابق اگلے بارہ گھنٹوں کے دوران کشمیر، بالائی خیبرپختونخوا، اسلام آباد، شمال مشرقی پنجاب، پوٹھوہار ریجن، گلگت بلتستان، شمال مشرقی و جنوبی بلوچستان اور جنوبی سندھ کے بعض علاقوں میں بارش، آندھی اور گرج چمک کا امکان ہے۔
اس کے برعکس، ملک کے دیگر حصوں میں شدید گرمی اور حبس کا راج برقرار رہے گا۔
پی ڈی ایم اے نے عوام سے اپیل کی ہے کہ موسم کی پیشگوئی سے باخبر رہیں، خاص طور پر ممکنہ سیلابی علاقوں میں احتیاطی تدابیر اختیار کریں کیونکہ آئندہ چند دنوں میں بارشوں اور دریاوں میں پانی کی سطح بلند ہونے کے باعث شدید خطرات لاحق ہو سکتے ہیں۔
