گوگل نیوز پر ہمیں فالو کریںملک بھر میں بجلی کی قیمتوں میں کمی کا امکان ظاہر کیا جا رہا ہے اور اس حوالے سے ایک درخواست دائر کی گئی ہے جس میں بجلی کے نرخوں میں 2 روپے فی یونٹ کمی کی سفارش کی گئی ہے۔
کراچی سمیت پورے ملک میں بجلی کی قیمتوں میں سہ ماہی ایڈجسٹمنٹ کے تحت کمی متوقع ہے۔ بجلی کی تقسیم کار کمپنیوں نے نیپرا سے رابطہ کیا ہے اور تقریباً 2 روپے فی یونٹ تک نرخوں میں کمی کی درخواست دی ہے۔
یہ درخواست نیپرا کو رواں مالی سال کی دوسری سہ ماہی ایڈجسٹمنٹ کے تحت دی گئی ہے جس میں بجلی صارفین کو 52 اعشاریہ 12 ارب روپے کا ریلیف دینے کی سفارش کی گئی ہے۔ نیپرا نے اس درخواست پر سماعت 12 فروری کو مقرر کر دی ہے۔
یہ بات قابل ذکر ہے کہ گزشتہ کچھ عرصے سے بجلی کی قیمتوں میں مسلسل اضافہ دیکھا گیا جس کے نتیجے میں صارفین پر بھاری بلوں کا بوجھ پڑا اور کچھ افسوسناک واقعات میں شہریوں کی خودکشی کی خبریں بھی سامنے آئیں۔
کچھ اطلاعات کے مطابق پاکستان پر عائد آئی ایم ایف کی شرائط کے تحت بجلی کے نرخوں میں اضافہ لازمی قرار دیا گیا تھا تاکہ ملک کو قرضے مل سکیں۔
وقت گزرنے کے ساتھ صورتحال میں بہتری آئی ہے اور اب بجلی کی قیمتوں میں کمی کے اقدامات کیے جا رہے ہیں جس سے عوام کو کچھ حد تک ریلیف ملنے کی امید ہے۔
