سیاسی بیروزگاروں نے سیاسی آکسیجن کیلئے آج ایک اور بیٹھک لگائی، فواد چوہدری

اسلام آباد: وفاقی وزیر اطلاعا ت و نشریات فواد چوہدری نے کہا ہے کہ ناکام اور عوام سے مسترد شدہ سیاسی بیروزگاروں نے سیاسی آکسیجن حاصل کرنے کیلئے ایک اور بیٹھک لگائی۔

انہوں نے کہا کہ بارہا انہیں سمجھایاسیاست میں اپنی جگہ بنانے کیلئے اجلاسوں کی تاریخیں نہیں، اپنے لچھن بدلیں، مولانا کی امامت میں انکے احتجاج کا مستقبل پہلی تحریکوں سے ہرگز مختلف نہ ہوگا۔

اپنے بیان میں انہوں نے کہاکہ ناکام اور عوام سے مسترد شدہ سیاسی بیروزگاروں نے سیاسی آکسیجن حاصل کرنے کیلئے آج ایک اور بیٹھک لگائی، بارہا انہیں سمجھایا کہ سیاست میں اپنی جگہ بنانے کیلئے اجلاسوں کی تاریخیں نہیں، اپنے لچھن بدلیں۔

انہوں نے کہاکہ انہیں یہ بھی سمجھایا کہ عوام کے دلوں تک کا راستہ سازشوں سے نہیں اپنے کرتوتوں سے توبہ کرکے ہموار کیا جاسکتا ہے، مگر سیاسی بے روزگاروں کی انجمن کا فیصلہ ہے کہ پاکستان میں کسی اچھے کام کا حصہ نہیں بنیں گے۔

وفاقی و زیر نے کہاکہ مولانا کی امامت میں انکے احتجاج کا مستقبل پہلی تحریکوں سے ہرگز مختلف نہ ہوگا، معیشت کی تباہی کی بنیاد رکھ کر یہ جس غریب عوام پر عرصہ حیات تنگ کرکے گئے وزیراعظم مسلسل ان کے دکھوں کا مداوا کرنے میں مصروف ہیں۔

وفاقی وزیر نے کہاکہ 120 ارب کے تازہ ترین ریلیف پیکیج کے سامنے آتے ہی اس گروہ کو اپنا مستقبل مستقل تاریکیوں کی نظر ہوتا دکھائی دے رہا ہے، وزیراعظم کے اعلان کردہ پیکیج سے اشیائے ضروریہ رعایتی نرخوں پر عوام کو دستیاب ہوں گی۔

وفاقی وزیر نے کہاکہ آج کی بیٹھک کا دوسرا بڑا فیصلہ ہے کہ انتخابات میں شفافیت کی کوئی کوشش کامیاب نہیں ہونے دیں گے، یہ گروہ چاہتا ہے کہ انتخابات میں دھاندلی کے دروازے کھلے رہیں تاکہ ان کی بقاء کے امکانات زندہ رہیں۔

مزید پڑھیں: وفاقی حکومت نے کالعدم ٹی ایل پی سے پابندی ہٹانے کی منظوری دیدی

وفاقی وزیر نے کہاکہ انہیں انتخابی نظام کی تطہیر اور معیشت کی تعمیر میں رکاوٹ بننے دیں گے نہ اس ایجنڈے سے پیچھے ہٹیں گے، یہ بازو ہمارے آزمائے ہوئے ہیں کسی دھونس اور دھمکی سے مرعوب نہیں ہوں گے