بھارت میں  گائے ذبیحہ کے الزام میں پولیس نے7 مسلم نوجوانوں کی ٹانگوں میں گولیاں مار دیں

غازی آباد :اتر پردیش کے علاقے غازی آباد میں پانچ دن قبل گائے ذبیحہ کے مبینہ الزام میں انکاؤنٹر کے بعد 7 نابالغ نوجوانوں کو مقامی پولیس نے ٹانگوں میں گولیاں ماردیں۔

سینئر سپرنٹنڈنٹ آف پولیس پون کمار نے بتایا کہ ملزمان کی شناخت مستقیم، سلمان، مونو، انتظار، ناظم، آصف اور بولار کے طور پر کی گئی ہےجبکہ دو دیگرنوجوان، بھورا اور دانش فرار ہو گئے۔

پولیس کا کہنا ہے کہ چھاپے کے دوران ملزمان نے پولیس ٹیم پر فائرنگ کردی جس کے بعد سیکورٹی اہلکاروں نے جوابی کارروائی کی۔

مزید پڑھیں:سرچ آپریشن اور جعلی مقابلوں میں 30 کشمیری شہید، پاکستان کابھرپوراحتجاج

ساتوں ملزمان کی ٹانگوں میں گولیاں لگی ہیں۔ انہوں نے بتایا کہ غازی آباد پولیس نے ملزمان سے تین گایوں کی باقیات، سات دیسی ساختہ پستول، سات خالی کارتوس، پانچ چاقو اور دو کلہاڑیاں برآمد کی ہیں۔

دوسری جانب گائے کے بیوپاریوں سے تصادم کے صرف دو دن بعد ہی غازی آباد پولیس میں 5 ایس ایچ اوز کا تبادلہ کر دیا گیا۔

ایس ایس پی پون کمار نے ایس ایچ او راجندر تیاگی کو لونی بارڈر تھانے کے انچارج کے عہدے سے ہٹا کر اندرا پورم تھانے کا انسپکٹر کرائم برانچ بنا دیا۔