گوگل نیوز پر ہمیں فالو کریںاسلام آباد: وزیرِ اعظم پاکستان عمران خان نے وفاقی کابینہ کا اجلاس 2 روز بعد 26 جنوری کو طلب کر لیا ہے۔
تفصیلات کے مطابق وفاقی کابینہ کا اجلاس دوپہر 12 بجے وزیرِ اعظم ہاؤس میں منعقد ہوگا جس کے دوران ملک کی سیاسی و معاشی صورتحال کا جائزہ لیا جائے گا، اس دوران براڈ شیٹ کیس میں پیش رفت کا جائزہ بھی ایجنڈے کا حصہ ہے۔
وفاقی کابینہ کے منگل کے روز ہونے والے اجلاس کا 17 نکاتی ایجنڈا جاری کردیا گیا ہے جس کے مطابق وفاقی کابینہ کو ری اسٹرکچرنگ ٹاسک فورس کے چیئرمین بریفنگ دیں گے۔ بریفنگ قدرتی آفات اور رسک مینجمنٹ کے متعلق ہوگی۔ کابینہ اجلاس کے دوران کورونا ویکسین کی قیمت مقرر کرنے کی منظوری بھی دی جائے گی۔
کابینہ کو معاشی اشاریوں پر بریفنگ دی جائے گی، کنٹونمنٹ بورڈز کے بلدیاتی انتخابات کی تاریخ اور شیڈول بھی منظور کیا جائے گا۔ کابینہ کمیٹیوں کی تشکیل اسلام آباد ہائی کورٹ کے احکامات کے مطابق کرنے پر بھی گفتگو ہوگی۔ نفٹ میں لازمی سروسز ایکٹ نافذ کرنے کی منظوری بھی دی جائے گی۔
پاکستان کی ماحولیاتی آلودگی سے متعلق عالمی نیٹ ورک بمبو اینڈ رتن میں شمولیت پر بھی بریفنگ ہوگی۔ سیکیورٹی پرنٹنگ کارپوریشن میں لازمی سروس ایکٹ کی توسیع کی توثیق کی جائے گی۔ نادرا کے مالی سال 2020ء کے آڈٹ کی منظوری بھی دی جائے گی۔
یہ بھی پڑھیں: براڈ شیٹ کے معاملے پر وفاقی کابینہ نے کمیٹی تشکیل دے دی
