حکومت معیشت کی بہتری کے لیے پیداواری شعبوں کو مراعات دے رہی ہے، وزیر اعظم

اسلام آباد: وزیراعظم عمران خان نے کہا ہے کہ حکومت معیشت کی ترقی کے لیے پیداواری شعبوں کو مراعات دے رہی ہے۔

اجلاس کی صدارت کرتے ہوئے وزیر اعظم کا کہنا تھا کہ حکومت نے صنعتوں اور آئی ٹی سیکٹر کے لیے ایک تاریخی پیکج دیا ہے۔عمران خان نے کہا کہ حکومت نے ملک میں کاروباری سرگرمیوں کو آسان بنانے کے لیے بڑے پیمانے پر اصلاحات متعارف کرائی ہیں۔

اجلاس کو بتایا گیا کہ وزیراعظم کی جانب سے صنعتوں اور آئی ٹی سیکٹر کے لیے اعلان کردہ پیکج پر تیزی سے عملدرآمد کیا جا رہا ہے۔ بتایا گیا کہ حکومتی اقدامات کے نتیجے میں فری لانسرز کی تعداد میں اضافہ دیکھنے میں آیا ہے۔

وزیراعظم عمران خان نے فری لانسرز اور آئی ٹی کمپنیوں اور صنعتوں کی سہولت کے لیے اعلان کردہ اقدامات پر بروقت عملدرآمد کی ہدایت کی۔

اس سے قبل وزیر اعظم عمران خان نے صنعتی شعبے کے فروغ کے لیے ایک مراعاتی پیکج کا اعلان کیا، تاکہ مقامی اور غیر ملکی تاجر برادری کی جانب سے سرمایہ کاری کو راغب کیا جاسکے اور برآمدات پر مبنی صنعتوں کو تقویت ملے۔

مزید پڑھیں: پشاوردھماکہ، وزیر اعظم عمران کی شدید مذمت، رپورٹ طلب کرلی

انہوں نے ایک تقریب سے خطاب کرتے ہوئے کہا جس میں تاجروں اور چیمبرز آف کامرس اینڈ انڈسٹری کے نمائندوں کی ایک بڑی تعداد نے شرکت کی۔”مقامی تاجروں کے ساتھ ساتھ، ہم بیرون ملک مقیم پاکستانی تاجروں کو بھی ملک کے صنعتی شعبے میں سرمایہ کاری کی دعوت دے رہے ہیں۔ غیر ملکیوں کے علاوہ، جوائنٹ وینچر میں مقامی تاجر بھی بغیر کسی روک ٹوک کے پانچ سال کی ٹیکس چھٹیوں سے لطف اندوز ہوں گے،”