پری زاد کی شہرت سرحد پار پہنچ گئی، بھارتی اداکارہ سونم باجوہ بھی مداح بن گئیں

پاکستانی ڈرامہ پری زاد نے مقبولیت کے نئے ریکارڈ قائم کرتے ہوئے پاکستان کے علاوہ سرحدپار بھی کامیابیوں کے جھنڈے گاڑ دیئے ہیں، ڈرامہ کی غیر معمولی کامیابی اور اداکار احمد علی کی شاندار اداکاری پر بھارتی اداکارہ سونم باجوہ بھی فین ہوگئی ہیں۔

سونم باجوہ نے انسٹاگرام پر پیغام میں ڈرامہ اور احمد علی اکبر کی تعریف کی،احمد علی اکبر نے سونم کا پیغام اپنے انسٹاگرام پر شیئر کیا جس پر مداحوں نے بھرپور تعریف کی۔چند روز قبل بالی ووڈ اداکار وکرم کپاڈیہ نے بھی احمد علی کی تعریف کی تھی۔

مزید پڑھیں:ڈرامہ سیریل پری زاد مداحوں کی توقعات پر پورا نہ اترسکا

اپنی منفرد کہانی اور جاندار اداکاری کے باعث مشہور ڈرامہ سیریل پری زاد اپنی پہلی ہی قسط سے سوشل میڈیا صارفین کی توجہ حاصل کرنے میں کامیاب رہا۔ ڈرامہ نگار ہاشم ندیم کے ٹی وی سیریل میں احمد علی اکبر کی اداکاری کو بے حد پسند کیا گیا۔

بنیادی طور پر ڈرامہ سیریل پری زاد ایک سیاہ رنگت کے حامل قبول صورت شخص کی کہانی ہے جو بہت ذہین اور نیک طبیعت کا مالک ہوتاہے۔ ٹی وی سیریل کیلئے ہدایات شہزاد کشمیری نے دیں جبکہ کاسٹ میں کرن تعبیر، اشنا شاہ اور دیگر اداکار شامل تھے۔