معروف عالم دین مفتی تقی عثمانی نے کہا ہے کہ مسئلہ فلسطین کا دو ریاستی حل کسی صورت قبول نہیں۔
مجلس اتحاد امت پاکستان کے زیراہتمام اسلام آباد کے جناح کنونشن سینٹر میں حرمت اقصیٰ کانفرنس سے خطاب کرتے ہوئےمفتی تقی عثمانی نے کہا کہ فلسطین کا دو ریاستی حل کسی صورت قبول نہیں، کیونکہ دو ریاستی حل کا مطلب اسرائیل کو تسلیم کرنا ہے، اسرائیل کو کسی صورت تسلیم نہیں کیا جاسکتا۔
غزہ پر حملوں کے 2 ماہ مکمل، اسرائیل نے 16 ہزار فلسطینی شہید کردئیے
انہوں نے کہا کہ قائد اعظم نے اسرائیل کو ناجائز بچہ قرار دے کر کبھی تسلیم نہ کرنے کا اعلان کیا تھا، بانی پاکستان کے ریاستی اعلان سے پاکستان کبھی پیچھے نہیں ہٹ سکتا۔
مفتی تقی عثمانی نے مزید کہا کہ آج حماس کے جانبازوں نے آزادی کا موقع فراہم کیا ہے، حماس کے لڑنے والوں کو جنگجو کے بجائے مجاہدین کہا جانا چاہیے۔
انہوں نے کہا کہ عالم اسلام مغرب کی غلامی کا شکار ہے، سیاسی، معاشی اور فوجی اعتبار سے ہم غلامی کی زندگی بسر کررہے ہیں، دولت کے باجود مسلم ممالک غلامی کی زندگی گزار رہے ہیں، حالانکہ عالم اسلام کے پاس وسائل ہیں جو ان کا ناطقہ بند کرسکتے ہیں۔
مفتی تقی عثمانی نے زور دیا کہ اگر عالم اسلام متحد ہوکر فلسطینیوں کا ساتھ دے تو مغربی طاقتیں کچھ نہیں کرسکتیں، خدائی امریکا کے پاس نہیں اللہ کے پاس ہے۔