گوگل نیوز پر ہمیں فالو کریںوسطی امریکی ملک ایل سیلواڈور میں عالمی مقابلہ حسن جاری ہے۔ پاکستانی بیوٹی کوئن ایریکا رابن نے ریمپ پر ثقافتی رنگ بکھیر دیے۔
72 ویں مس یونیورس مقابلوں میں دنیا بھر سے 90 حسینائیں شریک ہیں۔
ہر سال ہونے والے اس مقابلے میں حسینائیں اپنی خوبصورتی، ذہانت، پیشہ وارانہ زندگی، سماجی کاموں کی بنیاد پر شریک ہوتی ہیں۔
اس سال پاکستان سے بھی 24 سالہ ماڈل ایریکا رابن شریک ہیں۔ مس یونیورس 2023 میں پاکستانی حسینہ ایریکا رابن نے اسٹائل گیم کا آغاز کر دیا۔
پاکستانی بیوٹی کوئن ایریکا رابن نے ریمپ پر اپنی دلکش موجودگی اور شاندار قومی ملبوسات کے ساتھ ناظرین کو محظوظ کیا۔
انھوں نے ایسے لباس کا انتخاب کیا جس سے پاکستان کی ثقافت اور تاریخ کے شاندار رنگوں کی ترجمانی ہورہی تھی، شرکاء نے بھی ماڈل کو دل کھول کر داد دی۔
ٹریبیون کے مطابق قومی ملبوسات کے سیگمنٹ کے لیے ایریکا نے کھاڈی ڈیزائن کے ملبوسات کا انتخاب کیا، جسے ’پہچان‘ کا نام دیا گیا ہے۔
کیپشن میں ملبوسات کی اہمیت کو تفصیل سے بیان کیا گیا اور ایریکا کے اپنے لباس کے ذریعے پاکستان کی ثقافت، تاریخ اور طرز زندگی کا جشن منانے کے مشن کو اجاگر کیا گیا۔
اداکارہ نے پیغام دیا کہ قومی لباس زیب تن کرنے کا مقصد پاکستان کی ثقافت، تاریخ اور طرز زندگی کا جشن منانا ہے۔
واضح رہے کہ گزشتہ برس مس یونیورس کا تاج امریکی حسینہ آر بونی گیبرئیل نے پہنا تھا۔
بھارت تین بار یہ اعزاز اپنے نام کر چکا ہے جس میں سنہ 1994 میں سشمیتا سین، 2000 میں لارا دتہ اور 2021 میں ہرناز کور سندھو مس یونیورس بن چکی ہیں۔
رواں برس مس یونیورس کون بنے گا اس کا اعلان 19 نومبر کو ہو گا۔
