پاک ایران دوطرفہ تجارتی ہدف بڑھانے پر اتفاق

اسلام آباد: وفاقی وزیرِخزانہ مفتاح اسماعیل نے پاکستان اور ایران کے درمیان تجارتی صلاحیت کے زیادہ سے زیادہ استعمال پر زور دیا ہے۔

تفصیلات کے مطابق وزیرِ خزانہ مفتاح اسماعیل سے اسلام آباد میں ایران کے سفیر سید محمد علی حسینی نے ملاقات کی، جس میں ایران کے سفیر نے کہا کہ پاکستان نے ہمیشہ ایران کے ساتھ اپنے تعلقات کو بہت اہمیت دی ہے۔

انہوں نے دوطرفہ تجارتی حجم میں نمایاں اضافہ کرنے کے لیے تمام ممکنہ اقدامات اٹھانے کے عزم کا اظہار کیا۔

ملاقات میں ایران کے سفیر سید محمد علی حسینی نے پاکستان کی موجودہ اقتصادی پالیسیوں کو سراہتے ہوئے کہا کہ دونوں ممالک کے درمیان توانائی، تجارت اور دیگر شعبوں میں وسیع تعاون کے وسیع امکانات ہیں۔

یہ بھی پڑھیں:

حکومت کا ملک بھر میں 100 یوٹیلیٹی اسٹورز کھولنے کا فیصلہ

ایران کے سفیر نے دوطرفہ تعلقات کی موجودہ صورتحال پر اطمینان کا اظہار کیا اور مشترکہ دلچسپی کے مختلف شعبوں میں تعاون بڑھانے میں گہری دلچسپی ظاہر کی۔

قبل ازیں چیئرمین جوائنٹ چیفس آف اسٹاف کمیٹی (سی جے سی ایس سی) جنرل ندیم رضا نے ایران کے صدر سید ابراہیم رئیسی سے ملاقات کی اور دونوں ممالک کے درمیان دوطرفہ سیکیورٹی اور دفاعی تعاون کو مضبوط بنانے پر تبادلہ خیال کیا۔