گوگل نیوز پر ہمیں فالو کریںپولیس کی تازہ رپورٹ میں سال 2025 کے پہلے دو ماہ میں کراچی میں 10ہزار سے زائد اسٹریٹ کرائمز کے واقعات رپورٹ ہونے کا انکشاف ہوا ہے۔
سال 2025 کے ابتدائی دو مہینوں میں شہر میں 10ہزار 356 اسٹریٹ کرائم کے واقعات درج کیے گئے۔
پولیس رپورٹ میں بتایا گیا ہے کہ دو ماہ کے دوران ڈکیتی مزاحمت پر 12 شہری قتل اور 41 زخمی ہوئے جبکہ 2ہزار 806 شہریوں کے موبائل فون چھینے گئے۔
28 فروری 2025 تک 306 گاڑیاں اور 7244 موٹر سائیکلیں چھینی یا چوری کی گئیں۔
مزید بتایا گیا کہ اس سال روزانہ کی بنیاد پر موبائل فون چھیننے کی اوسط شرح 48اعشاریہ 4، گاڑیاں چوری یا چھیننے کی اوسط 5اعشاریہ 3 جبکہ موٹر سائیکل چوری یا چھیننے کی اوسط 124اعشاریہ 9 رہی۔
پولیس کے مطابق 2024 کے پہلے دو مہینوں میں 14,419 اسٹریٹ کرائمز کے واقعات رپورٹ ہوئے تھے، اور اس اعتبار سے 2025 میں اسٹریٹ کرائم کی شرح 28اعشاریہ 18 فیصد کم رہی۔
پولیس حکام کا کہنا ہے کہ 2024 کے پہلے دو مہینوں میں ڈکیتی مزاحمت پر 32 شہری قتل اور 99 زخمی ہوئے تھے۔
رپورٹ کے مطابق گزشتہ سال جنوری اور فروری میں 4,120 موبائل فون چھینے گئے تھے، جبکہ 335 گاڑیاں اور 9,964 موٹر سائیکلیں چوری یا چھینی گئی تھیں۔
