سندھ حکومت کا اورنج لائن پراجیکٹ عبدالستار ایدھی کے نام سے منسوب کرنیکا اعلان

کراچی: سندھ حکومت نے اعلان کیا ہے کہ کراچی کا اورنج لائن پراجیکٹ مشہورومعروف آنجہانی سماجی رہنما عبدالستار ایدھی کے نام سے منسوب کیا جائے گا۔

تفصیلات کے مطابق شہرِ قائد میں میڈیا نمائندگان سے گفتگو کرتے ہوئے وزیرِ ٹرانسپورٹ سندھ شرجیل میمن نے کہا کہ سندھ حکومت نے اورنج لائن منصوبے کیلئے 100 فیصد فنڈز فراہم کیے۔ پراجیکٹ عبدالستار ایدھی کے نام سے منسوب ہوگا۔

یہ بھی پڑھیں:

وزیراعلیٰ سندھ مراد علی شاہ کا اورنج لائن منصوبہ تین ماہ میں مکمل کرنے کا حکم

میڈیا نمائندگان سے گفتگو کے دوران وزیرِ ٹرانسپورٹ نے کہا کہ چند روز میں بسیں کراچی پہنچ جائینگی۔ کچھ افسران کو یہیں رہنا ہوگا، اس لیے ان کے بستر یہیں لگوائے جا رہے ہیں۔ میں کام کا معائنہ کرنے کیلئے 3 روز خود یہاں آؤں گا۔

صوبائی وزیرِ ٹرانسپورٹ شرجیل میمن نے کہا کہ سندھ حکومت کی پوری کوشش ہے کہ ایک ماہ میں اورنج لائن منصوبہ مکمل کیا جائے۔ جنگی بنیادوں پر کام کیا جائے گا۔ عوام دیکھ سکیں گے کہ کام ہورہا ہے، منصوبے کی تفصیلات عوام کے سامنے رکھیں گے۔ 

خیال رہے کہ اس سے قبل وزیر اعلیٰ مراد علی شاہ نے محکمہ ٹرانسپورٹ کو ہدایت کی کہ اورنج لائن پروجیکٹ چار ماہ کے اندر مکمل کریں اور ریڈ لائن کو ٹینڈر کے مراحل کے لیے تیار کیا جائے۔

وزیر اعلیٰ ہاؤس میں بی آر ٹی ایس ، اورنج لائن اور ریڈ لائن کی پیشرفت کا جائزہ لینے کے لئےوزیراعلیٰ سندھ مراد علی شاہ نے جنوری 2021 میں اجلاس کی صدارت کی۔صوبائی وزیر اویس شاہ نے وزیر اعلیٰ سندھ کو بریفنگ دیتے ہوئے کہا کہ اورنج لائن پر جاری کام تقریبا آخری مراحل میں ہے۔