نیپرا نے کراچی کے شہریوں پر ایک بار پھر بجلی گرادی، قیمت میں 9 روپے 66 پیسے اضافہ

 اسلام آباد: نیپرا نے کراچی کے شہریوں پر ایک بار پھر بجلی گرادی، نیپرا کی جانب سے کے الیکٹر ک صارفین کے لئے بجلی 9 روپے 66 پیسے فی یونٹ مہنگی کرنے کی منظوری دے دی گئی۔

کے الیکٹرک نے نیپرا کو بجلی کی فی یونٹ قیمت میں 11.34 روپے اضافہ کرنے کی درخواست کی تھی، تاہم نیپرا نے بجلی 9 روپے 66 پیسے فی یونٹ مہنگی کرنے کی منظوری دی۔

بجلی کی قیمت میں اضافہ مئی کی ماہانہ فیول ایڈجسٹمنٹ کی مد میں کیا گیا ہے۔ نیپرا اعداد وشمار کا جائزہ لینے کے بعد تفصیلی فیصلہ جاری کرے گا۔

نیپرا حکام نے درخواست پر سماعت میں ریمارکس دیتے ہوئے کہا کہ مارچ کی نسبت ایل این جی 50 فیصد اور فرنس آئل 38 فیصد مہنگا ہوا ہے۔ جس پر کے الیکٹرک حکام نے جواب دیا کہ مئی میں پی ایل ایل کے کنڑیکٹرز ڈیفالٹ کرگئے تھے، جس پر چیئرمین نیپرا نے استفسار کیا کہ کیا اس کا بوجھ عام آدمی پر پڑے گا، اس معاملے پر ہمیں تحریری طور پر لکھ کردیں۔