العزیزیہ اسٹیل ملز ریفرنس، نواز شریف کی سزا کیخلاف اپیل سماعت کیلیے مقررکردی گئی

اسلام آباد: العزیزیہ سٹیل ملز ریفرنس میں سابق وزیراعظم اور ن لیگ کے قائد نواز شریف کی سزا کے خلاف اپیل سماعت کے لیے مقرر کردی گئی۔

اس حوالے سے اسلام آباد ہائی کورٹ کا دو رکنی بینچ یکم ستمبر کو اپیل کی سماعت کرے گا، ساتھ ہی نیب کی نوازشریف کی سزا بڑھانے اور فلیگ شپ ریفرنس میں بریت کے خلاف اپیلیں بھی سماعت کے لیے مقرر کردی گئی ہیں۔

واضح رہے کہ العزیزیہ ریفرنس میں نوازشریف کی اپیل پر آخری سماعت 18 ستمبر کو ہوئی تھی۔سابق وزیر اعظم نوازشریف اور نیب کی اپیلوں پر سماعت کے لیے اسلام آباد ہائیکورٹ کا خصوصی بنچ تشکیل دے دیا گیا ہے جس میں جسٹس عامرفاروق اورجسٹس محسن اخترکیانی شامل ہیں۔

احتساب عدالت کے جج محمد ارشد ملک نے العزیزیہ اسٹیل ملز اور فلیگ شپ ریفرنسز کے فیصلے سنائے تھے۔ وڈیو سکینڈل آنے کے بعدکارروائی کرتے ہوئے جج محمد ارشد ملک کو عہدے سے برطرف کر دیا گیا تھا۔