محرم الحرام کا چاند نظر نہیں آیا، عاشورہ 9 اگست کو ہوگا

 اسلام آباد: محرم الحرام کا چاند نظر نہیں آیا، یومِ عاشورہ 9 اگست کو ہوگا۔

تفصیلات کے مطابق نئے اسلامی سال 1444 ہجری کے پہلے مہینے محرم الحرام 1444ھ کا چاند دیکھنے کے لیے رویت ہلال کمیٹی کا اجلاس ہوا، جس کی صدارت چیئرمین مولانا عبدالخبیر آزاد نے کی۔

اجلاس کے بعد رویت ہلال کمیٹی نے اعلان کیا کہ ملک میں کہیں سے بھی چاند نظر آنے کی شہادت موصول نہیں ہوئی۔

مرکزی رویت ہلال کمیٹی کے مطابق یکم محرم الحرام 31 جولائی اتوار کو ہوگی اور یوم عاشور 9 اگست بروز منگل کو ہوگا۔

یہ بھی پڑھیں:

جسٹس طارق مسعود نے چیف جسٹس کے رویے کو غیر جمہوری عمل قرار دیدیا

دوسری جانب پنجاب حکومت کی جانب سے یکم محرم سے 10 محرم الحرام تک صوبے بھر میں دفعہ 144 نافذ کرنے کے احکامات جاری کردیے گئے ہیں۔

پنجاب حکومت کی جانب سے جاری کئے گئے احکامات کے مطابق صوبے بھر میں 9 اور 10 محرم کو ڈبل سواری پر بھی پابندی ہوگی۔

نوٹیفکیشن کے مطابق جلوسوں کے راستوں پرکسی قسم کی کنسٹرکشن کرنیکی اجازت بھی نہیں ہوگی،اس کے علاوہ صوبے میں اشتعال انگیز بینرز، پلے کارڈز اور تقاریرپر بھی پابندی کردی گئی ہے۔