گوگل نیوز پر ہمیں فالو کریںآل پاکستان موٹر ڈیلرز ایسوسی ایشن کے صدر ایچ ایم شہزاد نے اُمید ظاہر کی ہے کہ آئندہ وفاقی بجٹ میں ایسی تجاویز شامل ہوں گی جن کے تحت پانچ سال پرانی گاڑیوں کی درآمد کی اجازت دی جائے گی اور اس کے ساتھ ساتھ ڈیوٹی میں کمی بھی کی جائے گی۔
میڈیا رپورٹس کے مطابق ایچ ایم شہزاد نے کہا کہ حکومت تجارتی بنیادوں پر استعمال شدہ گاڑیوں کی درآمد کی بھی اجازت دے سکتی ہے۔
انہوں نے اُمید ظاہر کی کہ ان اقدامات سے استعمال شدہ گاڑیوں کی قیمت میں پانچ لاکھ سے دس لاکھ روپے تک کی کمی ممکن ہو سکتی ہے، اور یہ گاڑیاں ممکنہ طور پر 20 لاکھ روپے سے کم قیمت میں دستیاب ہو سکتی ہیں۔
ان کا کہنا تھا کہ جاپان میں پانچ سال پرانی گاڑی کی قیمت 3000 سے 4000 امریکی ڈالر کے درمیان ہے، جب کہ تین سال پرانی گاڑی کی قیمت تقریباً 8,000 ڈالر ہے۔ اس کے برعکس پاکستان میں مقامی سطح پر تیار کی جانے والی 660 سی سی گاڑی کی قیمت 30 لاکھ روپے سے تجاوز کر چکی ہے۔
ایچ ایم شہزاد نے مزید کہا کہ اگر پانچ سال پرانی گاڑیوں کی درآمد کی اجازت دی جائے اور ڈیوٹیز میں کمی کی جائے تو استعمال شدہ گاڑیوں کی سالانہ درآمد 30 ہزار یونٹس سے بڑھ کر 80 ہزار یونٹس تک پہنچ سکتی ہے، جس سے حکومت کے لیے اضافی ریونیو حاصل ہونے کا بھی امکان ہے۔
یاد رہے کہ گزشتہ ماہ پاکستان اور بین الاقوامی مالیاتی فنڈ کے درمیان استعمال شدہ گاڑیوں کی درآمد پر عائد پابندیوں کو ختم کرنے کے حوالے سے معاہدہ طے پایا تھا، جس کی خبر روزنامہ “دی نیوز” نے منگل کے روز دی تھی۔
اس معاہدے کے تحت مالی سال 2025-26 کے بجٹ میں استعمال شدہ گاڑیوں پر ٹیرف اس شرح سے 40 فیصد زائد مقرر کیا جائے گا جو نئی گاڑیوں کے لیے لاگو ہوتا ہے۔
