کراچی سمیت سندھ بھر میں مزید تیز بارش کی پیش گوئی

کراچی:  کراچی سمیت سندھ بھر میں گزشتہ روز سے جاری بارش نے ہنگامی صورتِ حال پیدا کردی ہے، بارش کا سلسلہ وقفہ وقفہ سے جاری ہے اور مزید بارش کی پیش گوئی کی گئی ہے۔

تفصیلات کے مطابق محکمہ موسمیات کا کہنا ہے کہ کراچی میں آج مزید بارش کا امکان ہے، جبکہ سندھ بھر میں 200 ملی میٹر تک بارش ہو سکتی ہے۔

خیال رہے کہ سندھ حکومت کی جانب سے آج کراچی اور حیدرآباد ڈویژن میں عام تعطیل کا اعلان کیا گیا ہے۔

وزیرِ اطلاعات سندھ شرجیل میمن کا کہنا ہے کہ آج سرکاری ادارے اور کارپوریشنز بند رہیں گے۔ انہوں نے ہدایت کی کہ طوفانی بارشوں کے باعث نجی شعبے کے دفاتر بھی بند رکھے جائیں۔

یہ بھی پڑھیں:

بلوچستان میں بارشوں سے ہلاکت کی تعداد 102 تک جاپہنچی

علاوہ ازیں فاقی حکومت کے کابینہ ڈویژن نے بھی بارشوں کے باعث چھٹی کا نوٹیفکیشن جاری کردیا۔

دوسری جانب پاک فوج کے دستے کراچی میں بارشوں سے متاثرہ علاقوں میں پہنچ گئے ہیں اور سول انتظامیہ کےساتھ امدادی سرگرمیوں میں مصروف ہیں، شہر کے مختلف علاقوں سے نکاسی آب کا عمل جاری ہے، مزید ہنگامی صورتِ حال سے نمٹنے کے لیے مزید ریسکیو ٹیمیں الرٹ پر ہیں۔