گوگل نیوز پر ہمیں فالو کریںکراچی کو بجلی فراہم کرنے والے ادارے (کے الیکٹرک) سے متعلق نیشنل الیکٹرک پاور ریگولیٹری اتھارٹی (نیپرا) کی سماعت میں بد نظمی اور شور شرابا ہوا۔
تفصیلات کے مطابق کراچی میں عوامی شکایات پر نیپرا کی سماعت بد نظمی کا شکار ہو گئی۔ سماعت میں شریک لوڈ شیڈنگ سے تنگ کراچی کے عوام نے کے الیکٹرک کے خلاف نعرے بازی شروع کردی جس سے سماعت بری طرح متاثر ہوئی۔
چیئرمین نیپرا کی زیرِ صدارت کراچی میں کے الیکٹرک کے خلاف عوامی شکایت پر سماعت ہوئی جس میں کے الیکٹرک حکام، اسٹیک ہولڈرز اور ہر شعبۂ زندگی سے تعلق رکھنے والے عوام نے شرکت کی۔
سماعت کے دوران چیئرمین نیپرا نے کے الیکٹرک کو موقع دینے کا عندیہ دیا تو ہال میں کے الیکٹرک کے خلاف نعرے لگنا شروع ہو گئے۔ کہا گیا کہ ہمیں وقت ضائع کرنے کیلئے بلایا گیا ہے۔
دورانِ سماعت تلخ کلامی بھی ہوئی۔ عوام نے کے الیکٹرک کے خلاف شدید نعرے بازی کی۔ سی ای او کے الیکٹرک تلخ کلامی اور نعرے بازی کو دیکھتے ہوئے سماعت ادھوری چھوڑ کر روانہ ہو گئے۔
بد نظمی پر شدید ردِ عمل دیتے ہوئے چیئرمین نیپرا نے کہا کہ جو منظم انداز میں بات نہیں کرے گا، اسے ہال سے نکال دیں۔ بعد ازاں چیئرمین نیپرا نے سماعت کو 30 منٹ کیلئے ملتوی کردیا۔
