گوگل نیوز پر ہمیں فالو کریںسعودی عرب کے مقدس شہر مکہ مکرمہ میں 20 لاکھ سے زائد عازمین حج آج میدانِ عرفات میں حج کا رکن اعظم وقوفِ عرفہ ادا کریں گے اور خطبہ حج بھی سنیں گے۔
تفصیلات کے مطابق حج کے رکن اعظم کی ادائیگی کے لیے لاکھوں عازمین میدان عرفات میں پہنچ گئے جہاں وہ ظہر اور عصر کی نمازیں قصر و جمع کی صورت میں ادا کریں گے اورخطبہ حج سنیں گے۔ مسجد نمرہ میں خطبہ حج دیا جائے گا۔مسجد الحرام کے امام و خطیب شیخ ماہر حمد المعیقلی خطبہ حج دیں گے، جسے اردو سمیت 50 زبانوں میں نشر کیا جاتا ہے تاکہ دنیا بھر کے مسلمان سمجھ سکیں۔
آج حجاج سارا دن میدان عرفات میں عبادت اور دعائیں کرتے گزاریں گے۔ عرفات میں حج کا خطبہ سننے کے بعد ظہر اور عصر کی نماز ملا کر ادا کی جائے گی۔ مغرب سے قبل حجاج کرام مزدلفہ کی طرف روانہ ہوں گے اور وہاں مغرب اور عشا کی نماز اکٹھی پڑھیں گے۔ مزدلفہ میں حجاج کرام رمی جمرات کے لیے کنکریاں اکٹھی کرلیں گے اور اتوار کی صبح واپس منیٰ روانگی ہوگی۔
حجاج کرام اتوار کی صبح کو رمی جمرات کریں گے جس کے بعد قربانی کی جائے گی اور عازمین کا فریضہ حج مکمل ہو جائے گا۔عرب میڈیا کا کہنا ہے کہ عرفات میں مسجد نبوی کے بعد مکہ مکرمہ کے علاقے کی دوسری بڑی مسجد نمرہ میں حجاج کرام کے استقبال کی تیاریاں کرلی گئی ہیں۔ مناسک حج کا آغاز گزشتہ روز ہوا تھا جب فضا لبیک اللھم لبیک کی صداؤں سے گونج اٹھی۔
سعودی عرب کے کچھ علاقوں میں درجہ حرارت 43 ڈگری سینٹی گریڈ تک بڑھنے کے ساتھ ہی سعودی حکام نے تمام زائرین پر زور دیا ہے کہ وہ دھوپ اور گرمی سے بچنے کے لیے چھتری کا استعمال کریں اور کافی مقدار میں پانی پئیں۔ سعودی وزارت صحت نے حجاج کرام کی فلاح و بہبود کو یقینی بنانے کے لیے 34,000 سے زائد ڈاکٹروں، نرسوں، فارماسسٹوں اور انتظامی عملے کو تعینات کیا۔
سعودی حکومت کی جانب سے حجاج کرام کیلئے 7ائیر ایمبولینسس اور 730 ایمبولینسس بھی دستیاب ہیں جو عازمین کو ضرورت پڑنے پر طبی امداد فراہم کرتی ہیں۔مسجد الحرام کے امام و خطیب شیخ ماہر حمد المعیقلی خطبہ حج دیں گے اور اس موقع پر 20 لاکھ سے زائد عازمین حج ظہر اور عصر کی نماز ایک ساتھ ادا کریں گے۔
امام و خطیب شیخ ماہر حمد المعیقلی خطبہ حج کے دوران دنیا بھر کے مسلمانوں کو اللہ تعالیٰ کے دین کی پیروی کا درس دیتے ہوئے مسلمانوں کیلئے حج کی اہمیت، دینِ اسلام میں اخلاقیات، عبادات اور معاملات سمیت دیگر اہم موضوعات پر فرزندانِ اسلام کو معلومات مہیا کریں گے اور اپنی زندگی کے ہر معاملے میں عدل و انصاف کا درس دیں گے۔
