گوگل نیوز پر ہمیں فالو کریںجمعیت علمائے اسلام کے سربراہ مولانا فضل الرحمان نے قطر کے دار الحکومت دوحہ میں مقبوضہ فلسطین کی مزاحمتی تنظیم حماس کے رہنماؤں اور شہید اسماعیل ہنیہ کے اہل خانہ سے ملاقاتیں کیں۔
مولانا فضل الرحمان جدہ سے قطر کے دارالحکومت دوحہ پہنچے، جہاں مولانافضل الرحمان نے وفد کے ہمراہ حماس رہنما خالد مشعل سے ملاقات کی۔ انہوں نے پاکستانی عوام کی جانب سے اسماعیل ہنیہ کی شہادت پر تعزیت کی، شہدائے غزہ کیلئے فاتحہ خوانی اور دعا کی۔
مولانا فضل الرحمان نے کہا کہ اسماعیل ہنیہ کی شہادت سے فلسطین کی جدوجہد آزادی کو تقویت ملے گی، مسجد اقصیٰ کو صہیونی غاصبوں سے آزاد کرنا مسلمانوں پر فرض ہے۔
ان کا کہنا تھا کہ مسجد اقصیٰ اور فلسطین کی آزادی سے کسی صورت دستبردار نہیں ہوں گے، جے یو آئی اور پوری پاکستانی قوم فلسطینیوں کی جدوجہد آزادی میں ساتھ کھڑی ہے۔
بعد ازاں مولانا فضل الرحمان نے شہید اسماعیل ہنیہ کے اہل خانہ سے بھی ملاقات کی۔ وفد کےساتھ ملاقات میں مولانا فضل الرحمان نے شہید اسماعیل ہنیہ کے اہل خانہ سے تعزیت کی۔
واضح رہے کہ گزشتہ سال نومبر میں مولانا فضل الرحمان نے دوحہ میں اسماعیل ہنیہ شہید سے ملاقات کی تھی اور غزہ میں اسرائیلی جارحیت کے خلاف اپنی حمایت کا اظہار کیا تھا۔
