عمران خان کو سازش کی آڑ میں جرائم چھپانے نہیں دیں گے۔مریم نواز

لاہور: پاکستان مسلم لیگ (ن) کی نائب صدر اور سابق وزیر اعظم نواز شریف کی صاحبزادی مریم نواز نے کہا ہے کہ عمران خان کو سازش کی آڑ میں جرائم چھپانے نہیں دیں گے۔

تفصیلات کے مطابق گزشتہ روز اپنے ٹوئٹر پیغام میں ن لیگ کی نائب صدر مریم نواز نے کہا کہ عمران خان پاکستان میں جو تباہی مچا کر گیا ہے، مسلم لیگ (ن) اسے ٹھیک کرنے میں لگی ہے۔

یہ بھی پڑھیں:

عمران خان ملک کا سب سے بڑا فتنہ ہے،  مریم نواز

ٹوئٹر پیغام میں مریم نواز نے کہا کہ ن لیگ اور شہباز شریف دن رات ملک میں مچی تباہی ٹھیک کرنے میں جتے ہوئے ہیں۔ عمران خان نے ملک ڈبویا اور غریب عوام کو مہنگائی کی چکی میں پیس دیا۔

عمران خان پاکستان میں جو تباہی مچا کر گیا ہےمسلم لیگ ن اور شہباز شریف دن رات اس کو ٹھیک کرنے میں جتے ہیں اور انشاءاللّہ بہتری آئے گی مگر معیشت کو ڈبونے اور غریب عوام کو مہنگائی کی چکی میں پیسنے والے توشہ خان کو اپنے جرائم سازش کی آڑ میں چھپانے نہیں دینا!

— Maryam Nawaz Sharif (@MaryamNSharif) May 7, 2022

پیغام میں مریم نواز نے سابق وزیر اعظم عمران خان پر تنقید کرتے ہوئے کہا کہ ان شاء اللہ ن لیگ کی کاوشوں سے بہتری آئے گی تاہم توشہ خان کو اپنے جرائم سازش کی آڑ میں چھپانے نہیں دیں گے۔ 

خیال رہے کہ اس سے قبل سابق وزیراعظم نواز شریف کی صاحبزادی مریم نواز کا کہنا تھا کہ عمران خان ملک کا سب سے بڑا فتنہ ہے، اس فتنہ کو جتنی جلدی  اُس کے اصل مقام تک پہنچادیں، اتنا ہی ملک بہتری کی جانب جائے گا۔

گورنر ہاؤس میں گزشتہ ماہ میڈیا سے گفتگو کرتے ہوئے مریم نواز کا کہنا تھا کہ ان لوگوں نے سیاسی دشمنی میں مسجد نبوی ﷺ کی بےحرمتی کی، مسجد نبوی میں افسوسناک واقعہ منصوبہ بندی کیساتھ کیا گیا۔