گوگل نیوز پر ہمیں فالو کریںمحکمہ موسمیات نے پیشگوئی کی ہے کہ کراچی میں آج موسم خوشگوار ہونے کا امکان ہے جبکہ کہیں ہلکی اور کہیں تیز بارش کی پیشگوئی کی گئی ہے۔
اس وقت شہر کا موسم نم اور مرطوب ہے جبکہ درجہ حرارت زیادہ سے زیادہ 34 ڈگری سینٹی گریڈ تک جانے کا امکان ظاہر کیا گیا ہے۔ جنوب مغرب سے ہلکی ہوائیں چل رہی ہیں اور فضا میں نمی کا تناسب 74 فیصد ریکارڈ کیا گیا ہے۔
ملک کے دیگر حصوں میں بھی بارش کی توقع ہے۔ آئندہ بارہ گھنٹوں میں کشمیر، بالائی خیبرپختونخوا، اسلام آباد، شمال مشرقی پنجاب، پوٹھوہار کے علاقے، گلگت بلتستان، شمال مشرقی اور جنوبی بلوچستان، اور جنوبی سندھ میں بارش، تیز ہوائیں اور گرج چمک کے ساتھ موسم تبدیل ہونے کی پیشگوئی کی گئی ہے۔
ملک کے دیگر علاقوں میں موسم گرم اور مرطوب رہنے کا امکان ہے۔ آج صبح مختلف شہروں میں درجہ حرارت کچھ یوں ریکارڈ کیا گیا، اسلام آباد میں 28، لاہور اور کراچی میں 29، پشاور میں 30، کوئٹہ میں 22، گلگت میں 24، مری میں 17 اور مظفرآباد میں 25 ڈگری سینٹی گریڈ۔
اسی طرح مقبوضہ جموں و کشمیر میں بھی جزوی ابر آلود موسم اور کہیں کہیں بارش، تیز ہواؤں اور گرج چمک کا امکان ہے۔ سری نگر، پلوامہ اور بارہ مولا میں درجہ حرارت 20، جموں میں 27، اننت ناگ میں 19 اور شوپیاں میں 21 ڈگری سینٹی گریڈ ریکارڈ کیا گیا۔
ماہرین کا کہنا ہے کہ مون سون کے اس مرحلے سے نہ صرف گرمی میں کمی آئے گی بلکہ مختلف علاقوں میں کسانوں کو بھی فصلوں کے لیے فائدہ حاصل ہو سکتا ہے۔
