گوگل نیوز پر ہمیں فالو کریںپاکستان محکمہ موسمیات کے مطابق کراچی میں آج موسم گرم اور مرطوب رہے گا جبکہ مضافاتی علاقوں میں بارش کا امکان بھی موجود ہے، ہوا میں نمی کی زیادتی کے باعث محسوس ہونے والا درجہ حرارت 45 ڈگری سینٹی گریڈ تک جا سکتا ہے۔
محکمہ موسمیات نے بتایا کہ شہر کا درجہ حرارت 38 ڈگری سینٹی گریڈ تک بڑھ سکتا ہے تاہم شدید نمی کے سبب یہ درجہ حرارت 45 ڈگری سینٹی گریڈ محسوس ہوگا۔ اس وقت کراچی میں اصل درجہ حرارت 32 ڈگری ہے لیکن جسمانی طور پر یہ 37 ڈگری محسوس ہو رہا ہے۔
نمی کا تناسب 70 فیصد ریکارڈ کیا گیا ہے جبکہ ہوائیں 10 کلومیٹر فی گھنٹہ کی رفتار سے چل رہی ہیں۔
دوسری جانب اگلے 12 گھنٹوں کے دوران ملک کے بیشتر حصوں میں موسم گرم اور خشک رہنے کا امکان ہے تاہم شمال مشرقی پنجاب، کشمیر، گلگت بلتستان، بالائی خیبرپختونخوا، جنوب مشرقی اور مشرقی سندھ کے چند مقامات پر جزوی طور پر ابر آلود موسم، گرد آلود ہوائیں اور گرج چمک کے ساتھ بارش کی توقع کی جا رہی ہے۔
اسلام آباد میں منگل کو درجہ حرارت 35 سے 37 ڈگری سینٹی گریڈ اور بدھ کو 36 سے 38 ڈگری سینٹی گریڈ کے درمیان رہنے کا امکان ہے۔
اسی طرح راولپنڈی میں بھی منگل اور بدھ کو زیادہ سے زیادہ درجہ حرارت انہی حدود میں رہنے کی پیش گوئی کی گئی ہے۔
ماہرین کا کہنا ہے کہ اس حبس، گرمی اور شدید نمی والے موسم کا منگل کو آخری دن ہے۔بدھ سے سمندری ہوائیں دوبارہ بحال ہو جائیں گی اور موسم میں نمایاں بہتری آنا شروع ہو جائے گی۔
