گوگل نیوز پر ہمیں فالو کریںکراچی کے علاقے سہراب گوٹھ میں واقع اسکریپ گوداموں میں بدھ کے روز اچانک آگ بھڑک اٹھی جس کے نتیجے میں شدید مالی نقصان کا خدشہ ظاہر کیا جا رہا ہے۔
قومی ذرائع ابلاغ کے مطابق آگ سہراب گوٹھ کے بڑا میدان علاقے میں واقع درجنوں گوداموں کو اپنی لپیٹ میں لے چکی ہے۔
فائر بریگیڈ کے عملے کو آگ بجھانے میں شدید مشکلات کا سامنا ہے کیونکہ جائے وقوعہ پر پانی کی شدید قلت ہے۔ گودام مالکان کا کہنا ہے کہ آگ شارٹ سرکٹ کے باعث لگی۔
متاثرہ مالکان کے مطابق اس مقام پر ایک ہزار سے زائد گودام موجود ہیں جن میں سے 30 سے زائد اس وقت شعلوں کی زد میں ہیں۔
ان کا یہ بھی کہنا ہے کہ فائر بریگیڈ کو جائے وقوعہ پر پہنچے ایک گھنٹہ گزر چکا ہے لیکن اب تک پانی کی فراہمی ممکن نہیں ہو سکی اور ہر بار یہی کہا جاتا ہے کہ پانی کے ٹینکر خود خریدیں۔
دوسری جانب فائر بریگیڈ حکام کا کہنا ہے کہ آگ پر قابو پانے کے لیے اس وقت چار گاڑیاں کام کر رہی ہیں تاہم محدود وسائل اور پانی کی کمی کی وجہ سے آگ بجھانے کی کارروائی میں وقت لگ رہا ہے۔
یہ امر قابلِ ذکر ہے کہ کراچی میں حالیہ مہینوں میں آتشزدگی کے واقعات میں مسلسل اضافہ دیکھنے میں آیا ہے، خاص طور پر وہ حادثات جو شارٹ سرکٹ کے باعث پیش آتے ہیں۔
ان واقعات کے نتیجے میں پہلے بھی بازاروں اور تجارتی علاقوں میں قیمتی جانوں اور املاک کا بڑا نقصان ہو چکا ہے، اس کے باوجود حفاظتی اقدامات اور بنیادی سہولیات کی فراہمی تاحال ناکافی ہے۔
