امریکہ اور پاکستان کے تعلقات کو خراب ہونے دینا دانشمندی نہیں ہوگی، وزیرخارجہ

نیویارک: وزیر خارجہ بلاول بھٹوزرداری نے کہا ہے کہ پاکستان اور امریکہ کے تعلقات ہمیشہ سے اچھے رہے ہیں اور اسی لئے دونوں کے مابین تعلقات کو خراب ہونے دینا دانشمندی نہیں ہوگی۔

وزیر خارجہ بلاول بھٹو زرداری نے امریکی اخبار کو دیے گئے ایک انٹرویو میں کہا کہ پاکستان اورامریکہ اپنی ماضی کی غلطیوں سے سیکھ سکتے ہیں، دونوں ممالک کے درمیان کشیدگی کو کم کرنا دونوں ممالک کے بہترین مفاد میں ہے۔ انہوں نے کہا کہ دونوں ممالک کے تعلقات کومزید خراب ہونے دینا دانشمندی نہیں ہوگی۔

اُن کا کہنا تھا کہ حالیہ برسوں میں باہمی تعلقات جس طرح کے رہے ہیں وہ نہ پاکستانی اورنہ ہی امریکی عوام کے مفاد میں ہیں، مجھے یقین ہے کہ امریکہ اورپاکستان کے درمیان مختلف امور پراتفاق زیادہ ہے اوراختلاف کم ہے۔

یہ بھی پڑھیں:

3 ہفتوں کے بعد مہنگائی کی شرح میں 0.26 فیصد کمی ریکارڈ

وزیرخارجہ بلاول بھٹو زرداری نے ایک سوال کے جواب میں کہا کہ اس وقت اتحادی حکومت کا حصہ بننا ہمارے لئے اس طرح سے ہے جیسے امریکہ میں ٹرمپ اور کلنٹن خاندان ایک حکومت کا حصہ ہوں۔

اُن کا کہنا تھا کہ میں انقلاب کے بجائے ارتقا پریقین رکھتا ہوں، پاکستان اورامریکہ کے درمیان بہت سی چیزیں مشترکہ ہیں، دونوں ممالک کو پنے مثبت تعلقات پرجذبات کوحاوی نہیں ہونے دینا چاہیے کیونکہ اس میں کسی کا بھی فائدہ نہیں۔