گوگل نیوز پر ہمیں فالو کریںاسلام آباد ہائی کورٹ نے ٹیریان وائٹ کیس ناقابل سماعت قرار دینے کا تفصیلی فیصلہ جاری کردیا، فیصلے کے مطابق درخواست گزار ثابت کرنے میں ناکام رہا کہ ٹریان جیڈ وائٹ عمران خان کی حقیقی اولاد ہے۔
54 صفحات پر مشتمل تفصیلی فیصلے میں کہا گیا ہے کہ چیف جسٹس عامر فاروق کی سربراہی میں لارجر بینچ نے درخواست پر 30 مارچ 2023 کو سماعت کی، بینچ میں جسٹس ارباب محمد طاہراور جسٹس محسن اختر کیانی بھی شامل تھے۔
موقر معاصر ایکسپریس کی رپورٹ کے مطابق تحریری فیصلے میں کہا گیا ہے کہ لارجر بینچ کے دو اراکین کے فیصلے کے مطابق درخواست کو ناقابل سماعت قرار دیا گیا تھا۔
اسلام آباد ہائیکورٹ کا تین رکنی لارجر بنچ کیس کا فیصلہ کر چکا، جسٹس محسن اختر کیانی اور جسٹس ارباب محمد طاہر نے درخواست کو ناقابلِ سماعت قرار دیا، درخواست پر فیصلہ ہو جانے کے بعد اسی فورم پر دوبارہ نہیں چلایا جا سکتا۔
عدالت نے درخواست عمران خان کی ذاتی زندگی میں مداخلت قرار دے دی۔ فیصلے میں کہا گیا ہے کہ درخواست گزار ثابت کرنے میں ناکام رہا کہ ٹیریان جیڈ وائٹ عمران خان کی حقیقی اولاد ہے، بانی پی ٹی آئی کے لیے اپنے بچوں یا زیر کفالت بچوں کو ظاہر کرنا ضروری تھا، جبکہ ٹیریان جیڈ وائٹ نہ تو بانی پی ٹی آئی کی قانونی بیٹی ثابت ہوئی نہ ہی ان کے زیر کفالت ثابت ہوئی۔
فیصلے میں کہا گیا ہے کہ چیف جسٹس عامر فاروق نے نوٹ لکھا جس میں انہوں نے ایک صحافی کے ٹویٹ کا ذکر کیا، چیف جسٹس عامر فاروق نے صحافی کے ٹویٹ پر کیس سننے سے معذرت کرلی، انہوں نے اپنے فیصلے میں درخواست کو قابل سماعت قرار دیا۔
چیف جسٹس عامر فاروق نے بینچ توڑتے ہوئے درخواست پر نیا بینچ تشکیل دینے کی ہدایت جاری کردی، چیف جسٹس کے اس اقدام نے بینچ کے اکثریتی فیصلے کو کالعدم کردیا۔
تحریری فیصلے میں کہا گیا ہے کہ امریکی عدالت کا 1997 کا مقدمہ پاکستانی عدالت میں قانونی طور پر ثابت کرنا ضروری ہے، تاکہ پاکستانی قوانین کے مطابق فیصلے کی تصدیق ہوسکے۔
تحریری فیصلے کے مطابق درخواست گزار کسی بھی قسم کا غیر متنازعہ امر ثابت نہ کرسکا، پٹیشنر نے امریکا کی لاس اینجلس عدالت سے 13 اگست 1997 کو یکطرفہ ڈگری ہونے والے مقدمہ کا حوالہ دیا۔
فیصلے میں کہا گیا کہ وہی فریق عدالت آ سکتا ہے جو غیر ملکی عدالت کی ڈگری کو پاکستان میں قابل عمل کروانا چاہتا ہو، جبکہ درخواست گزار پاکستانی شہری اور امریکی عدالت کے فیصلے میں خود فریق نہیں ہے۔
اسلام آباد ہائیکورٹ کے تحریری فیصلے کے مطابق صرف ٹیریان جیڈ خان وائٹ ہی قانونی حق وراثت یا ولدیت کے لیے غیر ملکی عدالت کی ڈگری کو قابل عمل بنانے کا حق محفوظ رکھتی ہے۔
واضح رہے کہ اسلام آباد ہائی کورٹ کے لارجر بینچ نے سابقہ بینچ کے فیصلے پر انحصار کیا، جسٹس طارق محمود جہانگیری کی سربراہی میں تین رکنی لارجر بینچ تشکیل دیا گیا تھا۔
لارجر بینچ نے کہا کہ اس معاملے پر پہلے ہی دو ارکان کا اکثریتی فیصلہ موجود ہے، چیف جسٹس کی سربراہی میں تین رکنی لارجر بینچ بینچ سربراہ کے الگ ہونے پر تحلیل ہو گیا تھا۔
