دہلی کالونی میں6منزلہ عمارت گرانے اوراجازت دینے والے افسران کیخلاف کارروائی کا حکم

کراچی:سندھ ہائیکورٹ نے دہلی کالونی میں 66گزپر قائم 6منزلہ عمارت گرانے، چار ہفتے میں کلفٹن کنٹونمنٹ بورڈز کے افسران کیخلاف کارروائی مکمل اور ریٹائرڈ ملازمین و افسران کا معاملہ نیب کو ارسال کرنے کا حکم دیدیا۔

ہائیکورٹ میں دہلی کالونی میں 66 اسکوائر یارڈ پر قائم 6 منزلہ عمارت بنانے کا کیس کی سماعت کے دوران عدالت نے ریمارکس دیئے کہ اگر فیصلے پر عمل نہ ہوا تو ڈائریکٹر ملٹری لینڈ پر توہین عدالت لگائیں گے۔

عدالت نے استفسار کیا کہ بتائیں، کیا کارروائی کی اپنے افسران کیخلاف؟ وکیل کلفٹن کنٹونمنٹ بورڈ نے کہا کہ معاملہ ڈائریکٹر ملٹری لینڈ کو منتقل کر دیا گیا۔ سپریم کورٹ میں ان دنوں ملٹری لینڈ سے متعلق کیس چل رہا ہے۔

مزید پڑھیں:کراچی کی تباہی برسوں کا نوحہ

عدالت نے برہمی کا اظہار کرتے ہوئے کہا کہ آپ کو ایک ماہ پہلے اپنے ذمہ دار افسران کے خلاف کارروائی کا حکم دیاتھا۔ وکیل کلفٹن کنٹونمنٹ بورڈ نے کہا کہ ذمہ داران کے خلاف چارج شیٹ فریم کریں گے، کچھ وقت درکار ہے۔

جسٹس فیصل کمال عالم نے ریمارکس دیئے آپ کے کون کون سے افسران ذمہ دار قرار پائے؟ کنٹونمنٹ کے وکیل نے کہا کہ کچھ ملازمین ریٹائر ہو چکے ہیں۔ جسٹس فیصل کمال عالم نے ریمارکس دیئے جو ریٹائرڈ ہو گئے، ان کے خلاف معاملہ نیب کوبھیجیں جو حاضر سروس ہیں ان کے خلاف کارروائی کریں۔

چار ہفتے کاوقت دے رہے ہیں، بتائیں کیا پیش رفت ہوئی۔ عمارت گرائیں اور ذمہ دار افسران کے خلاف کارروائی کریں۔ دہلی کالونی میں غیر قانونی تعمیرات کے خلاف عدنان نامی شہری نے درخواست دائر کی تھی۔