گوگل نیوز پر ہمیں فالو کریںکراچی سمیت سندھ کے جنوبی علاقوں میں 27 سے 29 جون 2025 کے دوران موسلادھار بارشوں کی پیشگوئی کی گئی ہے۔
محکمہ موسمیات پاکستان (پی ایم ڈی) کے مطابق سمندر میں بننے والا ایک ہوا کا کم دباؤ سندھ کی جانب بڑھ سکتا ہے جس کے نتیجے میں کراچی، ٹھٹھہ، بدین، میرپور خاص، عمر کوٹ اور دیگر جنوبی اضلاع میں بارش کی شدت معمول سے زیادہ ہو سکتی ہے۔
اگر یہ سسٹم سندھ میں داخل ہوتا ہے تو یہ ایک غیر معمولی موسمی صورتحال ہوگی، کیونکہ آخری بار جون کے مہینے میں ایسا سسٹم 1977 میں سندھ میں داخل ہوا تھا، جس کے نتیجے میں ریکارڈ بارشیں ہوئی تھیں۔
ماہرین موسمیات کے مطابق 27 جون کو دن کے آغاز میں مطلع جزوی طور پر ابر آلود رہے گا اور صبح کے اوقات میں گرج چمک کے ساتھ موسلا دھار بارش کا امکان ہے۔
28 جون کو صبح اور دوپہر کے وقت تیز بارشوں کا سلسلہ جاری رہنے کی توقع ہے جبکہ 29 جون کو دوپہر یا شام میں ایک بار پھر گرج چمک کے ساتھ بارش متوقع ہے۔
اس دوران ہوائیں 35 سے 45 کلومیٹر فی گھنٹہ کی رفتار سے چل سکتی ہیں، اور شہر کے نشیبی علاقوں میں پانی جمع ہونے کا خطرہ ہے۔
محکمہ موسمیات اور ضلعی انتظامیہ نے شہریوں کو خبردار کیا ہے کہ وہ احتیاطی تدابیر اختیار کریں۔
غیر ضروری سفر سے گریز کریں، بجلی کے آلات کو پانی سے دور رکھیں اور نکاسی آب کے نظام کو فعال رکھیں تاکہ کسی ہنگامی صورتحال سے بچا جا سکے۔
عوام سے گزارش ہے کہ وہ سوشل میڈیا پر غیر مصدقہ اطلاعات پر یقین نہ کریں اور صرف محکمہ موسمیات یا ضلعی انتظامیہ کی جانب سے جاری کردہ ہدایات پر عمل کریں۔
کراچی اور سندھ کے دیگر علاقوں میں گزشتہ کئی ماہ سے جاری خشک سالی کے بعد یہ بارشیں خوش آئند ثابت ہو سکتی ہیں۔
شہریوں نے اللہ تعالیٰ سے دعا کی ہے کہ یہ بارشیں خیر و برکت کا ذریعہ بنیں اور کسی نقصان کا سبب نہ بنیں۔
ان شاء اللہ، یہ موسمی سلسلہ سندھ کے خشک موسم کو راحت بخش بنانے میں کلیدی کردار ادا کرے گا۔
